Sekretariu Estadu Politika Formasaun Profesional e Empregu servisu hamutuk Plan Internasional fo formasaun hasa’e kapasidade ba joventude distritu Aileu.
Country Diretor Program Plan Timor –Leste, Terance Garth Caughan, hateten akordu ne’ebe sira hala’o ho Sekretariu Estadu Politika Formasaun Profesional no Empregu (SEPFOPE), ne’e ho objetivu fornese abilidade no prepara joven sira asesu ba servisu .
“Projetu ne’e fo oportunidade ba joven sira atu asesu ba servisu,” Caughan dehan, hafoin asina MOU ho SEPFOPE, iha Kaikoli, Dili.
Iha lidun seluk, Seretariu Estadu Ilidio da Costa, agradese tebes ba apoia ne’ebe organizasaun Plan Internasional fo, tanba bele ajuda governu prepara joventude sira sai ema ne’ebe kreativa hodi partisipa iha prosesu dezenvolvimentu iha rai laran.
“Ida ne’e hanesan pasu importante ida ba SEPFOPE, katak iha ona sentru formasaun ida tan iha Aileu ne’ebe finansia no supporta husi Plan Internasional,” SE da Costa katak.
Nia hatutan, formasaun ne’e depende ba ejizensia joventude distritu Aileu nian, maibe ba apoia ida ne’e sira sei fo formasaun iha area agrikultura, jestaun, kanalizasaun bee moos, durasaun tinan ida.
Nia mos husu ba joven sira iha distritu Aileu, atu aproveita tempu no oportunidade ne’e didiak atu aprende buat diak ruma, hodi kompete iha merkadu servisu labele toba. “Se la’e nafatin sai penonton iha rai rasik,” SE da Costa husu.
Iha parte seluk, Jerente Program Plan Internasional, Etha Mota, hateten alem de apoia finanseiras, mos fo ajudus direitamente ba sentru formasaun sira ne’ebe hetan ona akreditasaun husi SEPFOPE atu fo treinamentu vokasional ba juventude sira hanesan sentru formasaun Camea no tempu badak sei apoiu mos sentru formasaun Don Bosco Comoro.
“Ami nia alvu mak joventude sira ne’ebe presiza duni ita nia ajuda liu –liu iha area remota ne’ebe susar asesu ba informasaun, dorp out husi eskola sira ne’e presiza skill ida bele ajuda sira,” Mota katak.
