Selebrasaun loron nasional feto ne’ebe sei hala’o iha dia 03 Novembru kada tinan, tinan ida ne’e komisaun organizadora sira preparadu ona atu selebra loron ne’e, tanba preparasaun atinji ona pursentu 50.
Prezidente Komisaun Organizadora (KO), Henrique da Silva, hateten selebrasaun ba tinan ida ne’e diferente ho tinan kotuk, tanba sei iha programa importante lima hanesan atividade hakerek istoria partisipasaun feto iha luta indepedensia ne’ebe sei sai reflesaun ba loron istoriku ne’e.
“Ita bele dehan, tinan ida ne’e serimonia bo’ot, tanba sei iha programa barak no sei hetan partisipasaun husi nasaun seluk ne’ebe hamahon an iha AsEAN,” Prezidente KO, Silva dehan, iha Dili.
Alem de ne’e, nia dehan iha mos programa Gender Award (apresiasaun jeneru) iha nivel distrital liu –liu individu ne’ebe durante ne’e kontribui promove igualidade jeneru iha sosiedade, inklui mos ministerio sira ne’ebe implementa politika abordagen integradu jeneru iha linha ministerio rasik.
Tuir nia, maske loron nasional feto monu iha dia 03 Novembru, maibe selebrasaun sei hala’o iha dia 08 Novembru, tanba iha loron 03 ne’e feriadu finadu nian.
Selebrasaun ne’e sei partisipasaun husi nasaun sira ne’ebe hamahon an iha Asian no nasaun seluk hanesan Norwegia, Australia, Protugal.
Nia hatutan, iha selebrasaun ne’e sei partisipa mos banda musika Kotak husi Indonezia no banda musika nasional sira hamutuk lima atu anima komunidade sira.
Iha parte seluk, Diretora organizasaun Caucus ‘feto iha politika’, Julieta Fereira, hateten sira mos iha programa oioin iha selebrasaun loron nasional ba feto hodi fo onra ba heroina sira ne’ebe mate ona.
“Ami hala’o kadi kakutak kona ba igualidade jeneru ba estudantes iha eskola Ensino Sekundariu sira iha nivel nasional deit,” Ferreira dehan.
