Membru Polisia Nasional Timor-Leste ne’ebe maka sei nafatin involve iha grupu arte masiais, Komando Jeral PNTL sei fo demisaun ba membrus ne’e.
Terseiru Adjuntu Polisia Nasional Timor-Leste (PNTL), Superintendente Julio Hornai hateten, Ministru Defeza e Seguransa (MDS) hasai ona rezolusaun iha pontu 12 no pontu ikus liu maka laiha toleransia ba membru polisia ne’ebe maka involve iha arte marsiais.
Nia hatutan, dadaun ne’e husi komando hasai ona sirkulasaun ida ba Komando Distrital no ba departamentu hotu-hotu atu husu ba nia membru sira ne’ebe involve iha arte marsiais ruma tenke dada an ona.
“Tenke aprezenta nia a’an mai komando hodi hili, hakarak kontinua servisu servi nasaun, ou rezigna an hodi fila ba arte marsiais,” III Adjuntu PNTL, Julio Hornai dehan, iha Dili.
Tuir nia, kuandu sira nafatin komete, maka husi komando sei foti desizaun halo demisaun ou pecat kedas. “Ne’e laiha tawar menawar,” Superintendente Hornai katak.
Nia dehan, rezolusaun ida ne’e iha nia vantajen diak ba polisia sira, tanba bainhira deside an sai polisia, maka pronto atu servi nasaun no povu, neutron no la involve grupu ka partidu ruma.
Entretantu Deputadu Mateus de Jesus, hateten, ne’e rezolusaun ne’ebe diak, nune’e membru PNTL sir abele servisu ho independente no neutro.
“Tanba sai polisia no F-FDTL ne’e atu servi deit nasaun no povu, hatudu neutralidade ba ema hotu,” Deputadu de Jesus hateten.
Iha lidun seluk komunidade Rio Oliveira, konkorda ho desizaun ne’e, tanba PNTL nudar lutu ba nasaun iha mos obrigasuan atu hamrik ho independente no labele involve iha organizasaun arte masiais ruma.
