Polisia Nasional Tranzitu (POLTRANS) sei halo sosializasaun kona ba linha zebra cross liu husi televizaun, atu nune’e komunidade sira bele iha konesementu kona ba funsaun husi linha ne’e.
Komandante Polisia Nasional Tranzitu, Inspektor Xefe Antonio L.C.Soares, hateten durante ne’e sira sosializa linha zebra cross liu husi fahe pamfletu ba komunidade sira, halo sosializasaun iha estradas, maibe ema kontinua la kumpri.
“Entaun ami muda tiha sistema, tau hanesan iklan ida iha televizaun,” Komandante Soares dehan, iha Kaikoli, Dili.
NIa dehan, iha iklan ne’e hanesan pakote ida, kompostu husi fo hanoin hanesan ema lanu ne’ebe labele lori kareta ou motor, motorista sira tenke uja helm inklui mos respeita ema la’o ain iha linha zebra cross no labele simu telephone bainhira lori hela motor no kareta.
“Espera katak liu husi meius Ida ne’e bele loke ita hotu nia hanoin, iha konesementu kona ba funsaun linha zebra cross ne’e,” Komandante Soares esperansa.
Entretantu Deputadu Mateus de Jesus, apresia no konsidera inisiativa ne’ebe maka diak.
“Karik maneira hotu-hotu sira halo ona, maibe sira sente katak seidauk iha rezultadu diak, entaun sira koko fali meius ida hanesan ne’e, hau suporta,” Deputadu de Jesus apoia.
Iha lidun seluk komunidade Joao Fernandes, rekonese katak komunidade barak mak seidauk iha konesementu, balun hatene ona maibe seidauk iha konsensia atu halo.
