Membru Polisia nain tolu husi Departamentu Servisu Investigasaun Kriminal (SIK) hola parte iha misaun paz nian iha Guine Bissau.
Komandante Jeral Polisia Nasional Timor-Leste (PNTL), Komisariu Longuinhos Monteiro hateten, tempu to’o ona atu PNTL sira bele fo mos sira nia kontribuisaun ba nasaun seluk inklui iha Guine Bissau.
“Tinan sanuluh resin rua, ema ajuda ita iha ita nia dezenvolvementu no tempu to’o ona atu ita mos la’o, hanesan karik iha nasaun ruma presiza ita nia ajuda, ita pronto atu ajuda sira,” Koisariu Monteiro hateten.
Nia mos hatutan katak, Membru nain tolu ne’e tama iha misaun ida hanesan Embaixada Polisia Nasional Timor-Leste.
“Iha tinan kotuk liu iha membru nain rua maka ba ona durante tinan rua fulan ida, atu fo sira nia kontribuisaun, agora ita delega fali nain tolu ba,” Komisariu Monteiro afirma.
Tuir nia, membru nain tolu ne’e sei halo misaun iha Guine Bissau durante tinan ida fulan ida nia laran.
“Hau husu ba imi nain tolu atu bele hatudu imi nia komportanmentu, no ho disiplina hodi halo’o imi nia knar iha fatin neba” Monteiro esperansa.
Iha fatin hanesan Sargentu Xefe Virginia de Souza, husi Servisu Investigasaun Kriminal (SIK), sente kontente wainhira hetan fiar ida ne’e, atu bele fo mos nia kontribuisaun ba nasaun seluk.
“Hau kontente tebes, tanba hetan fiar ida ne’e, hau sei hatudu mos hau nia servisu ne’ebe maka diak” Superintendente de Souza kontente.
Entretantu Deputada Albina Marcal, konsidera ne’e nudar previlejiu ida ba PNTL, atu sira mos bele fo sira nia kontribuisaun ba nasaun seluk ne’ebe presiza.
