Governu sei harii sentru formasaun iha area turismu no ospitalidade ho estandart internasional, iha distritu Aileu iha tinan 2014, nune’e Timor-Leste bele prepara nia rekursu humanu iha area rua ne’e.
Tuir planu, sentru formasaun ne’e Ministeriu Edukasaun servisu hamutuk ho Sekretario Estadu Politika Formasaun Profesional no Empregu (SEPFOPE), iha tinan oin mai.
Sekretariu Estadu Ilidio da Costa, hateten sira sei halo aprosimasaun ho treinador sira husi nasaun seluk, atu mai apoia governu hodi loke sentru formasaun sira iha rai laran hahu tinan oin atu prepara foinsa’e sira moris iha proditivu.
Nia hatutan, Primeiru Ministru indika ona fatin atu loke sentru formasaun kona ba turismu no ospitalidade ne’ebe sei realize iha tinan oin mai.
“Ami buka hela atu halo agora dadaun ami halo dezenu ba sentru ne’e hodi loke iha distritu Aileu,” SE da Costa dehan, iha Kaikoli, Dili.
Iha parte seluk, Deputada Adolzinda Pires, konkorda ho inisiativa governu nian atu loke sentru ba area espesifiku rua ne’e, tanba nudar nasaun foun Timor-Leste presiza dezenvolve an liu husi area ekonomia, turismu no ospitalidade, tanba iha potensial ba area rua ne’e.
Nia hatutan, koalia kona ba turismu no ospitalidade ne’e la’os buat mesak ida maibe koalia kona ba oinsa prepara ema atu atende vizitantes sira ne’ebe vizita fatin turista sira inklui mos hotel sira iha rai laran ne’e.
“Hau hanoin ho loke sentru espesifiku ba area turismu no hospitalidade ne’e importante atu kapasita diak liu tan ita nia rekursu tanba dala barak ema husi nasaun seluk mai tun iha ita nia airport dehan ita nia customer services atende ladun diak,”Deputada Pires katak.
Tuir nia, bainhira governu fo ona atensaun ba area diversifikasaun entau rendementu Timor –Leste nian sei la mai husi deit mina, tanba bele mai husi mos area diversifikasaun no rendimentu povu nia mos komesa diak.
