Sekretariu Estadu Terras Propriedade Jaime Xavier Lopes hateten, komunidade ne’ebe maka durante ne’e hela iha uma estadu, iha obrigatoriu atu selu arendamentu ba governu.
Sekretariu Estadu dehan, tuir lei numeru 1/2003 konstituisaun, uma estadu hanesan, iha Aimutin, Perumnas Bairo-Pite, Surik Mas, Becora no fatin seluk tan, ne’e propriedade estadu nian.
“Governu sei la duni sai, maibe sei selu arendamentu ba governu liu husi Scretariadu Estadu Terras Propriedade,” SE Lopes dehan, iha nia knar fatin, Mandarin, Dili.
Tanba komunidade barak mak okupa uma iha area hirak ne’e, nia dehan, governu sei haruka sira selu tuir rendementu ne’ebe sira hetan.
Sekretariu Estadune’e hatutan, okupantes uma estadu ne’ebe la aprezenta an ba iha governu, mak estadu konsidera sira hela ho illegal.
“Wainhira governu presiza uma ne’e ou rai refere, governu bele ba foti deit, tanba la trata dokumentus hodi selu arendamentu,” dehan Sekretariu Estadu Lopes.
Tanba ne’e, nia husu, ba komunidade sira ne’ebe maka hela iha rai ka uma estadu maibe seidauk trata dokumentus hodi selu arendamentu, bele trata hela nune’e bele okupa ho legalmente.
Kona ba selu arendamentu, nia dehan, konforme rendimentu ne’ebe maka sira iha no iha lei rai nian ne’ebe foun ne’e iha artigu ida mak sei koalia kona ba ida ne’e.
“Sira selu to’o tinan hira maka bele sai nain ba rai refere,” SE Lopes katak.
Entretantu Deputadu Francisco Branco, hateten bazeia ba lei numeru 1/2003, katak rai estadu husi okupasaun Indonezia ne’ebe husik hela, ne’e partensia ba estadu e estadu iha poder tomak atu foti ou bele mos husik komunidade sira selu arendamentu.
“Ne’e diak, maibe presiza iha kontrolasaun husi governu ne’ebe masimu,” Deputadu husi bankada Fretilin ne’e katak.
Tuir nia, ho programa ne’e bele aumenta kustu governu nian, nune’e bele mos halo dezenvolvementu iha rai laran.
Entretantu Maria Jina, okupante uma estadu iha Perumnas Bairo-Pite, konsidera ne’e politika ne’ebe diak, maibe governu presiza sosializa lei refere ba komunidade sira ne’ebe maka hela iha rai estadu.
