Planu atu transforma merkadu Taibesi sai merkadu moderna, tuir Jestor Merkadu Administrasaun Distritu Dili, Bonifacio Soares katak, agora hein deit desizaun husi Ministeriu Komersiu Industria no Ambiente nian kona ba planu ne’e.
Nia dehan, tuir lolos sira nia parte muda tiha ona negosiante sira iha merkadu Hali laran ba iha merkadu Taibesi maibe seidauk bele tanba seidauk hetan autorizasaun husi MKIA.
“Hau rona dehan orsamentu iha tiha ona,la hatene orsamentu hira,” Jestor Soares dehan, iha Dili.
Entretantu negosiante Joao da Silva, ne’ebe durante ne’e fa’an iha merkadu Hali laran, dehan nia parte pronto muda ba iha merkadu Taibesi,kuandu iha ona autorizasaun husi governu.
“Hau prontu atu ba merkadu Taibesi maibe tenke muda hotu ami sira ne’ebe mak fa’an iha ne’e,” nia katak.
Nia mos husu ba governu, atu kria uluk kondisaun hanesan bee moos, eletrisidade no sintina antes muda sira ba iha merkadu Taibesi, nune’e bele fasilita sira nia negosiu ho diak liu tan.
Iha parte seluk tuir Deputadu Manuel da Costa Guteres, katak merkadu Taibesi abandona to’o agora tanba governu laiha planu ne’ebe diak.
“Ne’e failansu husi Ministeriu Komersiu no Industria anterior ninian ne’ebe laiha planu diak,” Deputadu Guterres dehan.
Tuir nia, governu estraga deit osan tanba merkadu ne’e halo tiha maibe to’o agora abandona hela no husik negosiante sira fa’an hotu iha Hali laran.
Deputadu ne’e hatutan, orsamentu atu hadia merkadu Manleu no Taibesi tau tiha ona maibe Ministeriu mak laiha planu atu ezekuta osan ne’e didiak.
“Se bele ezekuta ona ba, para labele kria tan merkadu iha dalan ninin sira ne’ebe sai fali preokupasaun ema hotu nian,” Deputadu Guterres sujere.
