Kompania Sunrise Joint Venture Timor-Leste, promote sei kontinua fo apoia inisiativa NGO Ba Futuru, hodi fo edukasaun ne’ebe ho kualidade ba labarik Timor-Leste, tanba sira mak fini ba nasaun nian.
Komitmentu ida ne’e ofisialmente hato’o husi Diretor Geral Woodside ho Sunrise Joint Venture Timor -Leste, Jhon Prowse, no apresia ho Ba Futuru nia inisiativa ba dezenvolvementu labarik sira nian.
“Ho laran kontente ami mos atu anunsia, katak ami kontinua nafatin ami nia supporta ba segundu faze husi inisiativa ida ne’e ba dezenvolvimentu labarik sira nian,” Diretor Prowse deklara, bainhira inagura fasilidade ba eskola infantil Ba Futuru, iha Comoro, Dili.
Entretantu Diretora organizasaun non governmental (NGO) Ba Futuru, Joana da Cruz, hateten loke eskola infantile ne’e, sira nia inisiativa rasik ho objetivu, halo intervensaun sedu ba labarik sira, antes tama ba eskola formal.
“Fornese aprendizajen ne’ebe seguru no edukasaun ne’ebe kualidade ba labarik sira hodi prepara sira ba moris social, mentalidade, emosional molok tama eskola formal,” Diretora da Cruz dehan.
Nia hatutan, iha tinan ida liu ba sira hetan apoia finanseira husi Sunrise Joint Venture (Woodside, Osaka Gas no Conocophilips), ho montante $90,000 inklui mos apoiu seluk husi nasaun Nova Zelandia, Embaixada Amerika liu husi Internasional Aid and Development Program no Head Of Mission Fund, hodi harii eskola ne’e.
Eskola ne’e iha salas rua, ne’ebe kompletu ho fasilidades edukasaun inklui fatin halimar labarik sira nian.
Alem de ne’e, nia afirma, Ba Futuru mos asina akordu foun ida ho Sunrise Joint Venture ho montante $200.000, atu dezenvolve fasilidades no kapasita rekursu humanu durante tinan ida, hodi asegura kualidade.
“Fundus ida ne’e ami sei uja hala’o atividade ba labarik sira no selu profesores sira ne’ebe hanorin inklui mos fo treinamentu ba profesores eskola infantil sira husi teritoriu tomak durante tinan ida nia laran,” Diretora da Cruz tenik.
Nia hatutan, prosesu aprendiaajen hahu kedas iha fulan Marçu liu ba ho total alunus hamutuk nain 17 no agora dadaun sira loke hela registrasaun ba labarik foun sira ne’ebe hakarak atu tama iha eskola infantil ne’e.
Diretora mos informa, katak estudante sira ne’ebe tuir prosesu aprendizajen iha fatin ne’e tenke selu tuir kresimentu ekonomia familia nian, ba sira ne’ebe laiha kbi’it atu selu ho finanseiru,,sira bele selu ho voluntario ajuda hamoos iha fasilidade ne’e.
Metodu aprendijajen ne’ebe sira uja hodi hanorin labarik sira fasil atu komprende mak liu husi kanta, halimar no seluk tan.
Entertantu Xefe Departementu Edukasaun Pre-Eskolar Ministerio Edukasaun, Marçal da Silva Mateus apresia ho inisiativa NGO Ba Futuru, atu bele halo intervensaun sedu ba dezenvolvimentu labarik sira nian.
“Hau hanoin ida ne’ebe diak tebes atu bele treina ita nia oan sira nia mentalidade, kapasidade husi inisiu idade tinan 2 to’o 3 atu responde ba nesesidade edukasaun formal (Pre-Eskolar),” Xefe Mateus apresia.
Iha oportunidade ne’e nia husu ba parseirus dezenvolvimentu sira atu nafatin supporta inisiativa organizasaun sira nian liu –liu area kapasitasaun profesores hodi apoiu Ministerio Edukasaun atu asegura kualidade edukasaun ne’ebe diak ba labarik sira.
