Husi: Venidora Oliveira, TDW
Udan bo’ot loron ida ne’ebe akontese iha fulan rua ba kotuk (Maiu), estraga total ponte ne’ebe halo ligasaun sub-distritu Luro ho Iliomar, distritu Lautem no kondisaun ida ne’e fo impaktu maka’as ba komunidades iha fatin rua ne’e.
Komunidade Luro, Manuel Monteiro konfesa katak, ponte ne’e hetan estragus tanba udan bo’ot ne’ebe akontese iha dia 06 de Maiu fulan rua liu ba.
“Ami iha suku ne’e hetan dezastre naturais barak ona, e ponte ne’e mos hetan estragus tanba udan foin lalais ne’e,” Monteiro informa, foin lalais, iha Lospalos.
Tanba ne’e, nia husu ba miisteriu relevante atu toma atensaun, nune’e komunidade iha fatin rua ne’e bele asesu ba ponte.
Entretantu Deputada Benvinda Catarina Rodrigues hateten, ne’e preokupasaun povu nian, ne’e duni ministeriu relevente tenke toma responsabilidade.
“Sira sente duni tanba akontese ba sira agora dadaun, tanba ne’e ministeriu relevante tenke tau urgente asuntu ne’e,” Deputada Rogdrigues sujere.
Deputada ne’e mos sujere, karik governu tarde atu hadia ponte ne’e, pelu menus kria dalan alternative seluk, atu nune’e povu iha fatin ne’eba bele hala’o sira nia atividade hanesan bai-bain,” Deputada ne’e sujere tan.
Iha parte seluk, Administrador Distritu Lautem, Zeverino dos Santos Sequeira hateten, nia parte hato’o ona relatoriu kona ba ponte ne’e ba iha Ministeriu Obras Publiku (MOP).
“Tanba kestaun ne’e emergensia nebe desizaun maibe iha relatoriu levantamentu de dadus no teknikus distritus ninian hasai ona, inklui dalan ne’ebe maka atu monu mos iha suku ne’eba” Administrador Sequeira katak.
Nia espera katak, iha tempu badak husi nasional sei bele konsidera relatoriu hirak ne’e hodi haruka sira nia teknika hodi bele mai hadia.
