Ministeriu Saude, iha ona planu atu estabelese sentru paliativus iha Ospital Nasional Guido Valadares, hodi fo atendimentu ba pasiente sira ne’ebe sofre moras grave no laiha ona posibilidade atu rekopera.
Ministru Saude Sergio Lobo, hateten durante ne’e pasiente barak mak haruka deit ba liur bainhira hetan moras grave ruma.
“Ita presiza sentru ida ne’e atu fo atendimentu ba sira, tanba ita haruka pasiente barak ba liur sona aimoruk deit, ita mos bele harii iha ne’e,” Ministru Lobo dehan, iha Dili.
Alem de ne’e, nia dehan, ministeriu mos iha planu atu estabelese sentru trauma, pulmonologia, hematologia inklui oncologia iha Ospital Nasional Guido Valadares (HNGV) e planu ida ne’e sei realize durante tinan lima nia laran, ho objetivu atu asegura, kuidadus saude sekundario no tersiario.
Maske nune’e, nia hatutan, sira sei iha difikuldade kona ba rekursu humanu, tanba atu sosa sasan ba sentru ne’e sira ne’e mos komesa prepara ona, hodi halo operasaun ba ekipamentus sira ne’e.
Maibe nia afirma, sira nafatin loke sentru sira ne’e maske laiha rekursu humanu, tanba povu presiza hetan atendimentu sira ne’e, e dadaun ne’e ministeriu halo ona aprosimasaun ho ospital sira iha Singapura, Indonezia no India.
“Atu apoiu Timor –Leste hodi estabelese sentru sira ne’e, tanba prepara ema ida presiza tempu 15 anos hodi hasai espesialidade ba area ida ne’e,” Ministru Lobo katak.
Iha parte seluk, Prezidente Komisaun F (saude, edukasaun, igualidade jeneru no veteranus), Deputadu Virgilio da Costa Hornai, apoia planu hirak ne’e, importante mak ba interese no nesesidade povu nian.
Nia hatutan katak ne’e obrigasaun governu nian atu kria kondisoens hodi fo asistensia saude ne’ebe kualidade ba povu tanba tuir Konstituisaun da Republika hateten saude gratuita ba povu.
“Hau hanoin servisu sira ne’ebe sira halo atu fo kondisoens ba servisu apoiu saude komunidade ba povu ne’e ami apoiu maibe importante mak planu sira ne’e integra iha orsamentu hodi realize,” dehan Deputadu Hornai.
Nia mos husu ba Ministerio Saude antes atu estabelese sentru sira ne’e importante hare uluk rekursu humanu nune’e operasaun sira ne’e la bele faila iha futuru.
Planu ne’ebe hanesan mos mai husi eis Vice Ministra Saude, Dra. Madalena Hanjam ne’ebe iha inisiativa atu kria klinika Paliativus ida hodi fo atendimentu saude no ekoraja nafatin pasiente no familia pasiente ne’ebe sofre grave hanesan kankur, kurasaun, rings halo transferensia ba liur maibe labele kura haruka fila fali deit mai.
“Atu loke pratika hau sei buka dalan hau sei hakerek hela proposal hodi buka osan bainhira iha ona osan hau loke iha ne’ebe deit atu ajuda moras ne’ebe labele kura ona,” dehan Dra. Madalena Hanjam, iha tinan ida liu ba.
