Diretor Nasional Inspesaun Geral do Trabalho, Aniceto Leto Soro hateten, diresaun inspesaun do trabalhu sei aplika sansaun multa ba ema individu no empregadores sira ne’ebe fo servisu todan ba labarik minoridade (18 anos mai karik) sira, tanba ne’e ona sira nia direitu.
Nia dehan, ne’e estadu nia dever hodi fo protesaun ba labarik sira, tanba alem de kria legilasaun no politika, Timor-Leste mos ratifika ona konvensaun internasional direitur humanus nian.
Diretor Soro hatutan, iha fulan kotuk, Sekretariu Estadu Politika Formasaun Profesional no Empregu (SEPFOPE) aprezenta ona esbosu lei trabalho infantil inklui lista servisu ne’ebe bandu labarik ne’ebe sira elabora ba iha Konselhu Ministru atu aprova.
“Tanba ne’e, se deit mak fo servisu ne’ebe todan ba labarik tantu empregador no individu, Inspesaun Geral do Trabalhu sei fo sansaun, selu multa ka medidas prevensaun, atu labele fo risku ba labarik sira,” dehan Diretor Soro, iha Dili.
Razaun bandu labarik sira labele halo servisu todan, nia dehan, tanba bele prejudika sira nia saude no seguransa.
Servisu hirak ne’e mak hanesan, hi’it batako, kahur masa, fase kareta, nune’e mos servisu agrikultura nian hanesan kaer traktor, taka kabubu no uja pestisida sira ne’ebe iha kimiku.
Nia afirma, bainhira lei no lista ne’e aprova ona, se deit mak fo servisu ne’ebe bandu tuir lista ba labarik, sira sei hetan sansaun multa ho montante $230 to’o $1,150, alem de ne’e ba empregador sira, sei la hetan projetu husi governu no rekomendasaun atu hetan lisensa servisu.
Iha parte seluk, Koordenador Protesaun Labarik Organizasaun Forum Tau Matan, Honorio Almeida katak, sira apresia tebes bainhira governu kria lei espesifiku ida hodi regula no proteje labarik husi interese individu sira, liu–liu trabalhu infantil“Ami hanoin politika ne’ebe governu kria atu hamosu politika legislasaun ba trabalho infantil ne’e positive tebes, hanesan kontribuisaun bo’ot ida, estadu bele proteze labarik sira ne’ebe hala’o servisu todan,” apresia Koordenador Almeida.
Nia espera katak, la’os kria deit lei, maibe garantia mos nia implementasaun bainhira hetan ona aprovasaun.
