Asosiasaun Radio Komunidade Timor-Leste, foin dadaun ne’e hetan asesor voluntariu nain rua husi Australia, atu fo formasaun hasa’e kapasidade ba servisu nain iha Radio Komunidade sira iha rai laran.
Prezidente Asosiasaun Radio Komonidade Timor-Leste (ARKTL), Prezado Ximenes rekonese katak, volunteer nain rua ne’e iha duni kapasidade no abilidade, atu fo sira nia esperiensia ba estasaun Radio Komunidade sira.
“Tanba liu husi sira nain rua nia Curiculum Vitae hatudu duni, katak sira iha esperiensia maka’as iha parte tekniku, no sira nia prezensa iha programa ne’e mos valuable tebes ho saida maka ARKTL proposta ba,” dehan Prezidente ARKTL, Ximenes, iha Palapaso, Dili.
Nia dehan, obejtu principal husi volunteer nain rua ne’e mak, atu fo kapasitasaun ba volunteer Radio Komunidade sira, hanorin sira oinsa mak bele halo manutensaun ba ekipamentus, nune’e bele dura ba tempu naruk.
“Ami sei fo sertifikadu ba ema sira ne’e tuir ona treinamentu ne’e, e ba future ami mos sei kontinua fo formasaun espesifiku liu tan,” dehan Prezidente ARKTL ne’e.
Entretantu Volunteer Advisor, Michael Wasmund hateten, treinamentu ne’ebe sira fo foka liu kona ba oinsa mak bele halo manutensaun ba ekipamentus radio nian.
Tuir nia, kada distritu sira fo treinamentu durante loron rua ka tolu nia laran, no iha loron primeiru hanorin kona ba kompozisaun estasaun no element ba estasaun kompostu transmitter,mixer no microphone.
“Oinsa sasan sira ne’e bele liga ba malu, tanba iha problema barak, tan ne’e presiza staff sira tenke iha konesmentu kona ba ida ne’e,” dehan Volunteer Advisor Wasmund.
Nia hatutan, sira mos fo hanorin kona ba oinsa hadia ekipamentus sira ne’ebe maka at kleur ona maibe bele uja fali.
Nia mos apresia tebes ba ARKTL ne’ebe sai hanesan sumbrinha ba estasaun Radio Komunidade 16 ne’ebe eziste iha rai laran durante ne’e.
Iha parte seluk Camilo Elo, partisipante husi Radio Komunidade Distritu Oe-Cusse, sente kontente ho formasaun ne’e tanba aumenta sira nia konesementu iha area manutensaun nian.
“Kapas los, e buat diak ne’ebe ami hetan treinamentu ne’e mak treinador sira konsege hadia ami nia rally automatic internal Tranmitter ne’ebe aat kuaze tinan tolu ho balun nia laran,” dehan Elo ho kontente.
La’os ne’e deit, nia dehan, sira mos konsege hadia komputador ne’ebe durante ne’e avaria, inklui ekipamentus radio nian balun.
Tanba ne’e nia esperansa katak, formasaun hanesan sei kontinua iha future, nune’e Radion Komunidade mos iha pesoal IT rasik no bainhira sasan ruma at bele hadia kedas.
