Xefe Sentru Saude Laclubar,Distritu Manatuto, Almerinda da C.Pereira informa katak, dadaun ne’e sira desaraska tebes bainihra atu halo transferensia pasiente, tanba kombustivel laiha hodi enxe iha kareta ambulansia.
Nia dehan, bainhira iha pasiente balun emergensia los no presiza halo transferensia, entaun familia pasiente tenke enxe rasik mina.
“Laiha dalan seluk, familia tenke enxe mina,” Xefe Sentru Saude Laclubar (SSL), Perreira dehan, iha Laclubar.
XefePerreira afirma, sira iha kareta ambulansia rua maibe durantene’e enxe mina iha capital distritu.
“Enxe iha ne’eba halo nakonu, depois mai halo servisu iha ne’e ,mamuk ba fali enxe iha ne’eba,” dehan Xefe Sentru Saude ne’e.
Entretantu Staf Administrasaun Logistika SSL, Manuel Soarese Quintao hateten, durante ne’e iha pasiente barak mak presiza atu halo transferensia maibe mina laiha.
“Kuandu pasientes sira presiza teb-tebes atu halo transferensia, entaun familia pasientes sira mak hasai rasik osan hodi enxe mina mak foin tula ba,” dehan Staf Administrasaun Logistika ne’e.
Iha fatin hanesan ,familia pasiente Joanina Soares, rekonese katak, sira rasik mak enxe mina hodi halo transfere moras ba ospital Manatuto, tanba sentru saude laiha mina.
“Ami, dalaruma husu sira tanba sa mak ambulansia tula pasiente ba iha distritu Manatuto familia pasiente mak enxe mina,sira dehan mina mak laiha,” katak familia pasiente ne’e.
Tanba ne’e nia husu ba governu liu husi Ministeriu Saude atu resolve problema ne’e, nune’e labele prejudika fali pasiente sira hodi hetan tratamentu intensive iha ospital, bainhira iha emergensia ruma.
