Moras Infesaun Respiratoriu (ISPA) dadaun ne’e sa’e maka’as ka domina hela iha Sentru Saude Laclubar, Distritu Manatuto, ho total pasiente hamutuk nain 1718 mak afeta moras ne’e.
Xefe Sentru Saude Laclubar,Almerinda da C.Perreira informa katak, moras ne’e sa’e maka’as desde fulan Janeiru 2013 to’o mai agora.
“Maioria labarik, husi idade tinan lima mai kraik hamutuk nain 206 mak afeta moras ne’e no halo konsulta iha sentru saude ne’e,” informa Xefe Sentru Saude, Perreira, iha Laclubar.
Nia dehan, kuaze loron-loron iha pasiente nain lima ka neen mak mai halo tratamentu iha Sentru Saude Laclubar (SSL).
Nia mos informa katak, stok aimoruk ba moras ne’e agora dadaun hela deit oituan no esperansa katak, iha tempu besik sira bele hetan tan stok foun husi nasional.
Entretantu tuir Staf Administrasaun Logistika SSL, Manuel Soarese Quintao katak, mora seluk maka hanesan moras diarea no pneumonia. “mos ba labarik tinan lima mai kraik mak afeta maka’as,” tenik Staf Administrasaun Logistika ne’e.
Nia dehan, total pasiente ba moras diarea ne’ebe halo tratamentu hamutuk 320, enkuantu moras pneumonia hamutuk nain 77.
Kona ba stok aimoruk, nia hatutan, sentru sempre husu ba iha nasional ba fulan tolu-tolu nian, maibe dala ruma mos seidauk to’o fulan tolu aimoruk hotu. “depende ba moras,” katak Staf Quintao.
