Estudantes Eskola Tekniku Profesional Akadiru-Hun ,Sub-distritu SameDistritu Manufahi la hetan osan subsidiu husi governu kona ba osan estajiu ninian.
Simao da Costa Xavier, Estudantes terseru ano Eskola Tekniko Profesional (ETP) Akadiru-Hun, Same ne’e hateten, Eskola Tekniku Professional (ETP) hotu-hotu, wainhira tuir estajiu hetan osan $30 husi governu, maibe estudantes ETP Same, la hetan osan maske estajiu remata tiha ona.
“Ami hasai rasik ami nia osan $30 tuir estajiu e agora estajiu hotu tiha ona, mas ami nia osan la fo fila,” preokupa Estudante Xavier, iha Same, Distritu Manufahi.
Iha fatin ketak, membru Komisaun F (edukasaun, saude, kultura, veteranus no igualidade jeneru), Deputadu Leonel Marcal , hateten nia parte ladun iha konesementu kona ba subsidiu ida ne’e maibe karik iha, sira sei buka tuir.
“Problema ida ne’e ami foin rona fali husi estudante katak, estajiariu sira iha osan, ami sei buka tuir,” Deputadu Marcal katak.
Deputadu ne’e katak, karik informasaun ne’e los, Ministeriu Edukasaun tenke esplika osan ne’e ba iha ne’ebe.
“Se karik informasaun ne’e mak sala, edukasaun tenke klarifika fali informasaun ne’e ba to’o iha eskola refere,” Deputadu Marcal sujere.
Enkuantu Deputadu Paulino Monteiro, promote katak asuntu ne’e sei hato’o ba iha ministeriu kompetente hodi esklarese.
“Preokupasun ne’ebe ita bo’ot sira fo mai am, ami sei hato’o ba iha Ministeriu Edukasaun, tebes ga la’e governu fo subsidiu ba estudantes bainhira halo estajiu,” Deputadu Monteiro katak.
