Ministru Saude, Sergio Gama da Costa Lobo, bandu funsiunarius hotu atu labele halo tusan maske iha situasaun emergensia nia laran tanba osan barak ne’ebe deve desde 2009 to’o agora balun seidauk selu.
“Ita seidauk selu tanba prosesu aprovizionamentu ne’ebe iha komplikadu tebes,” Ministru Lobo esplika ba Membru Parlamentu sira, foin lalais, iha Parlamentu Naisonal hatan ba perguntas Deputadu Adriano Joao.
Ministru Lobo dehan, deve kombustivel iha dalan ninin sira, ministeriu labele prosesa tanba laiha kontratu.
“Sira ba deve $100 akumula to’o $10,000, kuandu ita halo CPB mai iha Ministeriu Finansas atu selu, maibe sira labele halo buat ida tanba laiha kontratu, difikulta tebes,” Ministru Lobo tenik.
Nia hatutan, ministeriu agora dadaun halo hela negosiasaun ho Ministeriu Finansas atu tau osan oituan iha cash ministeriu nian nune’e bele responde ba kazu emergensia ruma.
Agora dadaun servisu ministerio nian hasoru difikuldade tanba ministerio finansas hasai ona sirkular numeru tres katak labele gasta osan liu 100 dolares bainhira prosesu aprovizionamentu komplikadu tebes.
Tanba ne’e nia husu ba diretores sira atu informa direitamente ba Ministru no Vise Ministru bainhira hasoru kazu emergensia ruma hodi resolve, labele rai tusan tanba governu sei la responsabiliza ida ne’e.
Iha fatin hanesan, Membru Parlamentu Nasional, Deputada Ilda Maria da Conçeicão, sente preokupa ho sirkular ne’ebe hasai husi Ministeriu Finansas tanba ida ne’e bele difikulta servisu saude nian.
Hanesan akontese iha Sentru Saude Distritu Viqueque no Liquisa, katak pasiente sira tenke lori rasik hahan husi uma tanba ospital la prepara hahan.
“Se sira la deve sira atu uja saida ,hau fo ezemplu ida deit, iha ospital sira kuandu laiha hahan ba pasiente se sira la deve, oinsa sira bele fo hahan ba pasiente sira,” Deputada Ilda preokupa.
