Membru Parlamentu Nasional sujere ba governu tenkeregula transportes publiku ne’ebe halo operasaun iha rai laran, liu-liu iha capital Dili , atu nune’e bele evita problema ne’ebe mosu derepente iha kareta laran.
Deputadu Inacio Moreira hateten, transportes hanesan taxi, mikrolet inklui bis sira ne’ebe halai balun sikat ka lori sasan kroat sira.
“Sasan kroat hanesan tudik, katana no sleuk tan, lolos labele sikat sasan kroat iha kareta laran, tanba ida ne’e halo ema trauma,” Deputadu Moreira tenik, foin lalais, iha Parlamentu Nasional.
Tanba ne’e nia sujere ba kondutor sira ne’ebe halo operasaun tula pasajeirus, atu labele lori sasan kroat iha kareta laran.
Alem de ne’e nia mos husu ba kondutor sira atu labele fuma bainhira lori hela kareta no pasajeirus sira iha hela kareta laran.
“Se la’e pasajeiru sir abele hetan moras,” Deputadu Moreira sujere.
Iha fatin hanesan Deputada Maria Adozinda Pires da Silva, husu ba Polisia Nasional Tranzitu (POLTRANS) atu halo revista ba karetas publiku, karik balun lori sasan kroat iha kareta laran.
“Hau fiar katak Polisia Nasional Timor-Leste mos halo hela aktividade sira ne’e,” Deputada husi bankada Frente Mudansa ne’e esperansa.
Entretantu Komandante POLTRANS, Inspektor Xefe Antonio L.C Soares katak,sasan kroat sira proividu atu ema lori maibe ida ne’e la’os kompetensia polisia nian.
“Tanba inflasaun tranzitu nian halai liu ba dokumentus, la’os ba sasan kroat sira,” Komandante Soares katak.
Nia dehan, halo operasaun ba sasan kroat iha kareta laran, ne’e servisu Polisia Operasional nian.
“Mas kuandu iha ami nia operasaun mak ami hetan sasan kroat, karik ami prende no entrega ba iha investigasaun criminal nian atu prosesa,” Komandante Soares afirma.
Nia rekonese katak, durante sira halo operasaun konjunta, deskobre katak kareta balun lori duni sasan kroat maibe entrega kedas ba investigasaun kriminal para prosesa.
