Ministeriu Saude sei sosa tan ambulansia lima iha tinan 2013 ne’e, hodi reforsa servisu atendementu saude ba komunidade sira, liu-liu evakua moras ne’ebe presiza halo tratamentu iha ospital referral no nasional.
Planu atu sosa tan ambulansia lima ne’e, tuir Ministru Sergio Gama da Costa Lobo katak, tanba bazeia ba ejizensia husi komunidade sira kona ba falta ambulansia iha sentru saude no ospital referral sira.
“Agora ami hetan kareta neen husi UN, husi neen ne’e rua kareta ambulansia, ambulansia 10 apoia husi governu Cina e ministeriu sosa tan 10, iha tan planu atu sosa ambulansia lima,” Ministru Lobo, foin lalais, hodi hatan ba preokupasaun husi deputadu sira kona ba falta ambulansia iha sentru saude sira, iha Parlamentu Nasional.
Maske nune’e nia hatutan, ministeriu sei halo lista kona ba total ambulansia iha teritoriu tomak inklui planu ba manutensaun no reparasaun tanba iha governu anterior kedas laiha lista ambulansia.
Tuir nia, lolos ministeriu fo prioridade ba kolokasaun medikus iha postu saude no sentru saude sira, nune’e bele minimize moras ne’ebe presiza ambulansia tanba durante ne’e halo evakuasaun ba moras ho razaun laiha medikus no do’ok husi fasilidade saude,.
Kona ba atu halo manutensaun ba ambulansia sira ne’e, Ministru afirma, iha fulan tolu liu ba ministeriu hetan apoia tekniku husi governu Australia hodi identifika material ne’ebe at tanba maioria ambulansia sira ne’e doasaun husi governu Korea.
Alem de ne’e, ministeriu mos sei fo treinamentu ba motorista ambulansia sira, hasae sira nia konesementu utilize ambulansia hodi evakua moras.
Entretantu Membru Komisaun F (Saude, Edukasaun, Jeneru no Veteranus), Deputada Ilda Maria da Conçeicão, katak bazeia ba fiskalizasaun ne’ebe sira halo, katak kuaze fasilidade saude iha teritorio tomak kestiona maka’as kona ba falta ambulansia.
“Hau hakarak hato’o iha Ospital Maliana ambulansia tau tiha moras iha laran, dudu mak moris hodi lori sai moras, e iha Oe-Cusse tinan rua ona la hadia no paradu,” Deputada Ilda kestiona.
Kona ba planu atu sosa tan ambulansia lima ne’e, nia dezafia tanba iha tinan kotuk Parlamentu Nasional liu husi komisaun F preve ona orsamentu atu sosa ambulansia maibe ikus mai ministeriu kansela no sosa fali motorizada ba iha medikus sira.
