Membru Parlamentu Nasional husu ho urgente ba Ministeriu Saude atu hadia jestaun iha ministeriu laran tanba durante ne’e jestaun iha ministeriu laran la’o ladun diak no fo impaktu bo’ot ba povu sira.
Tuir Deputadu Mateus de Jesus, katak problema setor saude hanesan problema nasional ne’ebe presiza fo atensaun urgent tanba relasiona ho ema nia vida.
“Problema ne’ebe ita hare durante ne’e halai liu jestaun logistika aimoruk, mosu problema barak iha nasional to’o distrital falta aimoruk, ida seluk jestaun administrasaun la’o oinsa ona,” lamenta Deputadu de Jesus, (14/05), iha Parlamentu Nasional.
Deputadu ne’e mos preokupa tanba Xefe Departementu sira iha Miniteriu Saude nia laran laiha konesementu kona ba orsamentu ne’ebe iha, so Ministru to’o diretores sira deit.
Entretantu Deputada Ilda Maria da Conceicão, kestiona maka’as manutensaun ba kareta ambulansia atu halo evakuasaun ba moras emergensia ruma husi sukus ba sentru saude no ospital referral sira ne’ebe durante ne’e sempre faila.
“Hau hakarak hato’o katak iha Ospital Referal Maliana,ambulasia tau ema moras iha laran dudu mak foin moris,” kestiona Deputada Ilda.
Hatan ba kestaun ne’e Ministru Saude, Sergio Gama da Costa Lobo rekonese katak, sistema jestaun iha setor saude durante ne’e sei fraku no promete sei hadia sistema sira ne’e hodi asegura atendimentu saude ba povu.
Nia dehan, informasaun hotu kona ba problema saude ne’ebe membru Parlamentu Nasional sira foti importante tebes nune’e ministeriu bele fo atensaun.
“Prioridade numeru 01 ba Ministerio saude agora ne’e mak hadia parte jestaun, tantu jestaun administrative, logistika inklui medikamentus hotu,” tenik Ministru Lobo.
Kona ba aimoruk ne’ebe sempre menus, nia dehan, tanba seidauk iha arbitu atu registu gastus aimoruk sira ne’ebe iha, aimoruk hotu ona foin hakfodak, pior liu Ministru no Vise Ministru sira sempre hatene ikus.
