Tuir analiza husi Estudante Komuniksaun Social Universidade Nasional Timor Lorosa’e katak esbosu Lei Komunikasaun Sosial ne’ebe dadaun ne’e iha fo liu benefisiu ba media nain sira duke ba jornalistas.
Tanba ne’e Estudante Komunikasaun Sosial, Leotancio Alves da Silva sujere ba Sekretariu Estadu Komunikasaun Sosial (SEKOMS) no ekipa lima ne’ebe draft lei ne’e atu hare didiak esbosu lei ne’e antes lori ba iha Konselhu Ministru atu diskute.
“Ha’u hanesan estudante komunikasaun social sente la kontente, karik esbosu lei ne’e hetan konkorda husi Konselhu Ministru no lori ba iha Parlamentu no aprova, tanba lei ne’e fo liu benefisiu ba media nain sira duke ba jornalista sira,” kestiona Estudante Alves, foin lalais, iha Liceu, Dili.
Tuir nia, Sekretariu Estadu komunikasaun Sosial (SEKOMS), iha kompetensia tomak atu aumenta tan artigu balun hodi komlpeta artigus ne’ebe iha ona maibe kestaun mak ne’e sei iha tan diskusaun ka la’e?.
Nia dehan, informasaun ne’ebe nia simu katak SEKOMS sei aprezenta esbosu lei ne’e ba iha Konselhu Ministru iha fulan Maiu nia laran, e espera katak Sekretariu estadu bele hadia ka aumenta artigu balun ne’ebe bele benefisia ba jornalista sira.
“Karik esbosu ne’e aban bairua sai hanesan lei duni, mak sei hamosu konfusaun ba maluk jornalista sira ne’ebe mak servisu iha media tanba esbosu lei ne’e la koalia kona ba responsabilidade media nian ba jornalista sira,” tenik Estudante Alves.
Entretantu Sekertariu Estadu Komunikasaun Sosiál, Nelio Isaac hateten, esbosu Lei Komunikasaun Sosial ne’e agora finalize ona hafoin seminariu internasional no iha artigu balun mak aumenta iha esbosu lei ne’e.
“Ita sei aumenta tan artigu balun hanesan koalia kona ba sansaun ba Radio Komunitariu sira inklui definisaun Jornalista, katak sé mak sai Jornalista, sansaun Jornalista sira bainhira halo sala nia indikasaun krime entaun nia responsabilidade ne’e halo nusa, pelu menus ami iha ideias ona atu formula ida ne’e para atu halo, iha mos hanoin kona ba novu media hanesan kria website ne’e ita kategoria hanesan Jornalista ga la’e tanba sira mos fo informasaun,” dehan SE Isaac.
SE Isaac hatutan, iha fulan Maiu nia laran sei aprezenta esbosu lei ne’e ba iha Konselhu Ministru hodi halo apresiasaun, desizaun husi Konsellu Ministru ne’e maka draft final no hanesan Sekertariu Estadu tenke ka’er para atu bele responsabiliza kona ba hanoin saida maka estadu hanoin kona-ba esbosu Lei Komunikasaun Sosiál.
