Diretor Jeral Ospital Nasional Guido Valadares, Domingos Soares sei halo negosiasaun ho Ministeriu Saude atu sosa makina CT-Scan foun ba HNGV, nune’e bele fo atendementu ba pasiente sira ne’ebe presiza hasai ray-x.
Diretor ne’e dehan, makina CT-Scan ne’ebe durante ne’e iha, agora at ona no labele hadia tanba makina ne’e tuan no ekipamentu atu halo manutensaun mos laiha.
“Ita iha opsaun rua ita atu hadia makina ne’e ka sosa foun fali signifika katak ita tenke halo negosiasaun ho governu atu tau osan hodi sosa foun tanba ekipamentu ba makina ne’e difisil hetan iha merkaduria,” dehan Diretor Jeral Ospital Nasional Guido Valadares (HNGV), Domingos Soares, foin lalais, iha Bidau, Dili.
Nia informa, makina CT-Scan ne’ebe at ne’e apoia husi Governu Korea liu husi Korean International Cooperation of Agency (KOICA) iha tinan 2009 ne’ebe konsege fo atendimentu ba populasaun durante tinan ida nia laran to’o makina ne’e at totalmente.
Nia dehan, makina ne’e importante duni atu halo diagnosa ne’ebe klaru ba pasiente sira nia moras maibe lasignifika katak moras hotu presiza makina ne’e tanba sei iha alternative seluk hanesan ultranografia ne’ebe mos bele halo diagnosa pasiente sira nian.
Nia informa, durante ne’e sira esforsu atu fo atendimentu nafatin ba pasiente sira maske makina ne’e avaria tanba laos moras hotu presiza ST-Scan maibe balun deit ne’ebe presiza liu atu halo diagnosa klaru tenke haruka ba iha liur hodi identifika moras sira ne’e.
Entretantu Membru Parlamentu Nasional, Deputada Ilda Maria da Conçeicão dezafia Ministerio Saude atu sosa fali makina CT-Scan foun ba HNGV tanba problema saude la’os deit ospital nasional maibe kuaze sentru saude hotu iha teritorio tomak falta fasilidade hotu.
“Lalika mehi tan atu sosa makina sira ne’e, ida prioridade atu hare teb-tebes mos sira seidauk haruka osan ba, oinsa atu sosa makina ne’ebe nia prosesu kleur,” dezafia Deputada Ilda.*
