Organizasaun Saude Mundial preokupa tebes ho labarik Timor-Leste ne’ebe dadaun ne’e barak mak fuma sigaru e tuir Doutor Jorge Mario Luna katak ida ne’e perigu tebes ba sira nia saude iha futuro.
Doutor Jorge Mario Luna, Reprezentante Organizasaun Saude Mundial (OSM) iha Timor-Leste, hateten iha Timor –Leste labarik minoridade ( tinan 9 ba leten) barak mak komesa fuma sigaru no hemu alcohol.
“Labarik sira ne’e bele risku afetadu moras oi-oin hanesan kanker, pulmaun, bele iha problema ho kakorok no nanal iha future,” preokupa Reprezentante OSM, Doutor Luna, foin lalais, iha Salaun Delta Nova, Dili.
Nia lamenta tanba maske Timor-Leste ratifika ona konvensaun internasional kontrola tabaco hodi kria regulamentu kontrola publisidade sigaru no fuma iha fatin publiku, maibe governu laiha seriadade hodi kumpri buat hirak ne’e.
Doutor Luna hato’o kestaun ne’e relasiona ho publisidade sigaru 23 ne’ebe monta iha fatin publiku sira iha capital Dili, tanba sigaru ladiak ba ema nia saude, maibe governu husik hela deit nune’e.
“Hau la espera katak governu Timor-Leste bele tau publisidade sigaru iha fatin publiku, ne’e ladiak tanba foinsa’e sira bele hare no sira komesa fuma sigaru,” Doutor Luna lamenta.
Tuir estatistika Demography and Health Survey 2009-2010 hatudu katak, labarik mane idade (15-19 anos) hamutuk 36% fuma sigaru kompara ho mane foinsa’e idade 24-29 hamutuk 87% fuma sigaru, ne’e signifika katak labarik minoridade barak mak agora dadaun fuma hela sigaru tanba presu sigaru baratu.
Iha parte seluk, membru Komisaun D (Ekonomia no Dezenvolvimentu), Deputada Josefa Alvares Soares hateten, Membru Parlamentu Nasional hamutuk ho OSM rekomenda ona ba governu atu kria regulamentu hodi hasa’e taxa sigaru inklui alcohol nian maibe laiha rezultadu.
“Feto sira ne’ebe fuma sigaru estraga mos sira nia oan fatin, bele laiha oan no bainhira fuma demais estraga ita nia pulmaun no tensaun,” tenik Deputada Soares.
