Atu fo atendementu diak liu tan ba feto no labarik vitima violensia bazeia ba jeneru sira iha teritoriu tomak, ba tinan ida ne’e (2013) Ministeriu Solidariedade Sosial aloka $539.603.10 ba parseirus nasional sira ne’ebe durante ne’e servisu ba vitima sira ne’e.
Diretor Interino Diresaun Reinsersaun Sosial (DRS) Ministerio Solidaridade Sosial (MSS), Florencio Gonzaga hateten, apoia orsamentu ne’e fob a parseirus sira ne’ebe durante ne’e fo asistensia ba feto no labarik sira ne’ebe sai vitima ba violensia bazeia ba jeneru.
“Orsamentu ne’e atu fo asistensia ba feto no labarik sira mais importante liu atu implementa buat ne’ebe ita defini ona iha lei lubuk ida nia laran liu –liu lei violensia domestika,” dehan Diretor Interino Gonzaga, foin lalais, iha Bemori, Dili.
Atual Xefe Departementu Protesaun Labarik ne’e hatutan, parseiru nasional sira ne’e mak ; organizasaun ACBIT, Fundasaun Alola, Forum Komunikasaun Feto Timor Lorosa’e (FOKUPERS), Forum Komunikasaun Joventude (FCJ), Casa Vida, PRADET, Uma Mahon Salele, Uma Mahon Luzeiru Lospalos, Uma Mahon Oe-Cusse, Uma Mahon Baucau, Rede Feto no Instituisaun Portugues nian e kada instituisaun sei hetan $10 mil ba leten.
Entretantu Prezidente Board FOKUPERS, Silveiro Baptista Pinto fo agradese ba konfiansa ne’ebe MSS ba sira hodi tau matan ba ema vulneravel sira no promete sei hakonu sidadaun sira nia direitu liu –liu ema vulneravel sira nia direitu atu sira mos bele goza sira nia direitu hanesan mos sidadaun sira seluk.
“Ami prontu nafatin atu implementa ami nia programa tanba programa ne’ebe ami halo hanesan mos governu nia plnau,” dehan Prezidente Board FOKUPERS, Silverio Pinto, hafoin asina MoU ho MSS (19/04).
Nia mos promete katak sira sei kumpri regras ne’ebe governu fo liu –liu data hatama relatorio ezekusaun orsamentu inklui mos programa sira ne’ebe hakerek ona iha proposta ida –idak.
