Prezidente Republika, Taur Matan Ruak husu ba Sekretaria Estadu ba Promosaun Igualidade atu dezenvolve diak liu tan kapasidade feto, ho objetivu prepara sira ba eleisaun rua ne’ebe sei hala’o iha tinan 2014.
Sekretaria Estadu ba Promosaun Igualidade (SEPI), Idelta Maria Rodrigues hato’o lia hirak ne’e hafoin hasouru malu ho Prezidente Taur Matan Ruak (TMR), (10/04), hodi informa kona ba progresu no dezafius ne’ebe feto Timor-Leste infrenta durante ne’e.
“Ita hatene katak eleisaun Kamara Munisipiu no Xefe Sukus sei hala’o iha tinan 2014, tanba ne’e prezidente husu para feto mos bele partisipa iha prosesu hirak ne’e,” informa Sekretaria EStadu Idelta Maria Rodrigues, foin lalais, iha Palasiu Prezidente Nicolao Lobato, Bairo-Pite, Dili.
Iha sorumutu ne’e, nia dehan, TMR mos hanoin lubuk ida ba SEPI oinsa atu hare kapasidade instituisaun ne’e nian hodi prepara feto sira iha eleisaun munisipiu no sukus ne’ebe partisipasaun feto importante tebes.
“Hau hanoin iha hanoin lubuk bo’ot ida mak Prezidente husu ba SEPI, maibe haul abele dehan ba ita bo’ot sira,” tenik SE Rodrigues.
Nia hatutan, sei iha problemas barak mak feto Timor infrenta liu –liu atu toma desizaun tanba realidade iha konselho sukus iha reprezentante feto maibe sira laiha lian sai preokupasaun bo’ot ida ne’ebe presiza tau atensaun.
Iha parte seluk reprezentante feto iha Parlamentu Nasional, Deputada Josefa Alvares Soares hateten katak agora oportunidade ne’ebe importante tebes ba SEPI atu promove igualidade jeneru iha eleisaun munisipiu no sukus.
“SEPI tenke hahu ona prepara kondisoens ba feto sira atu iha brani assume responsabilidade nudar Prezidente no membru asembleia kamara munisipiu bainhira lei ne’e aprova no implementa ona munisipiu,” sujere Deputada Soares.
Nia hatutan, sira sei hare kontiudu lei Kamara Munisipiu (KAMUS) rasik hodi garantia partisipasaun feto nian tanba sei la uza kuota ne’ebe Parlamentu Nasional aprova ona ba iha eleisaun parlamentar nian liu ba katak husi kandidatu nain tolu, feto tenke ida maibe sei iha kriteria foun.
