Reprezentante husi organizasaun feto sira husu ba Komisaun Peskiza ba Elaborasaun Historia Feto Timor atu aselera prosesu hakerek livrus kona ba papel feto ba libertasaun nasional ne’ebe agora hala’o hela
Maria Barreto, husi Asosiasaun Feto Jerasaun Foun, hateten livrus ida ne’e importante tebes ba sira “bainhira ami atu halo relatoriu ruma kona ba feto nian, ami bele uja referensia husi livrus ida ne’e,” tenik Reprezentante Asosiasaun Feto Jerasaun Foun, Maria Barreto, iha Tower Fatuhada, Dili.
Nia dehan, durante ne’e livrus kona ba feto sei menus loos, nune’e bainira atu halo relatoriu ruma kona ba feto nian susar oituan.
Entretantu Koordenador Komisaun Peskiza ba Elaborasaun Historia Feto Timor (KPEHMT), Nuno Rodrigues hateten sira sei esforsu an nafatin, atu oinsa mak bele finaliza livrus ida ne’e.
“Iha Junu ka Julhu hanesan ne’e ami bele finaliza, ami sei esforsu an,” tenik Koordenador Rodrigues.
Nia hatutan, prosesu atu hakerek livrus ida la fasil, tanba ne’e husu atu kalma hodi hein ekipa sira halo sira nia servisu ho diak.
Enkuantu Sekretari Estadu ba Promosaun Igualidade, Idelta Maria Rodrigues dezafia atu komisaun ida ne’e bele finaliza lalais livrus ida ne’e tanba la fasil.
Tuir nia, presiza rekolha informasaun barak husi feto sira ne’ebe uluk involve direitamente iha prosesu luta hasouru inimigu no sira nia kontribuisaun iha momentu ne’eba.
“Maibe hau espera katak iha komemorasaun loron nasional feto, it abele lansa livrus ida ne’e,” SE Rodrigues esperansa.
Prosesu atu hakerek livrus kona ba papel feto ba libertasaun nasional ne’e hala’o desde tinan 2010 no agora tama ona faze halo tranzisaun data no dokumentus sira ne’ebe intervistador sira rekolha ona.
