Membru Parlamentu Nasional preokupa tebes tanba to’o agora povu barak mak seidauk iha konesementu kona ba lei sira ne’ebe vigor iha nasaun Timor-Leste tanba ne’e husu ba governu atu esforsu hodi halo sosializasaun tama to’o iha suku sira. 
Tuir Deputadu Mateus de Jesus, katak hahu husi primeira legislature to’o mai iha terseiru legislature, iha ona lei barak mak produs, maibe komunidade barak ne’ebe hela iha area rurais seidauk hatene lei sira ne’e.
“Tuir hau nia observa,sira tun duni ba baze maibe dalaruma sira ba fahe informasaun kona ba lei ne’e sira to’o iha distritu deit ou dalaruma to’o iha sub-distritu deit,” dehan Deputadu Mateus de Jesus, foin lalais, iha PN.
Nia dehan, komunidade la’os deit iha capital distritu ka sub-distritu tanba ne’e kuadu atu fahe informasaun kona ba lei sira ne’e tenke tun to’o iha area rurais.
“Atu nune’e komunidade sira nebe maka iha area rurais sira bele asesu ba lei sira ne’e,” sujere Deputadu de Jesus.
Entretantu hatan ba preokupasuan hirak ne’e Vise Ministru Justisa, Ivo Jorge Valente katak, durante ne’e Diresaun Direitus Humanu e Sidadania mak halo divulgasaun no deziminasaun e sira halo komunikasaun bebeik ba baze.
“Maibe la sufsiente tanba lei ne’e, primeiru nia modifika, dala ruma fulan no dalaruma tinan lei ne’e troka, entaun komunikasaun ba ita nia komonidade mak intensivu liu tan,” tenik Vise Ministru Valente.
Nia hatutan katak, durante ne’e iha sosiadade sivil mos halo sosializasaun ba komunidade kona ba lei hirak ne’e iha kapital no mos iha distritu, e tenke iha mekanismu ida ne’ebe efetivu.
“Ita iha rekursu humanu, ita forma ita nia ema, agora kapasidade atu halo lalais ho diak ita sei hasoru difikuldade iha terenu, tanba dalaruma ita hetan ema matenek, hatene lei, hatene transmiti maibe komunidade balun la hatene Tetun,” katak Vise Ministru Justisa.
