Diretor Jeral Ospital Nasional Guido Valadares, Domingos Soares hateten stok aimoruk iha ospital agora dadaun menus no ida ne’e fo impaktu ba atendimentu ba pasiente sira.
Nia dehan, aimoruk hirak ne’ebe menus mak aimoruk mear nian, isin manas no seluk tan enkuantu aimoruk ne’ebe la uja barak los iha armajen laran.
“La’os sistema kalkulasaun sosa aimoruk mak ladiak maibe depende ba moras ne’ebe mosu,” tenik Diretor Jeral Ospital Nasional Guido Valadares (HNGV), Domingos Soares, (03/04), iha Bidau, Dili.
Nia dehan, menus aimoruk la’os akontese deit iha HNGV maibe kuaze fasilidade saude hotu maibe ho kapasidade ne’ebe Pesoal Saude sira iha konsege atende pasiente sira ho diak.
“Kuandu aimoruk oin ida laiha, pesoal saude sira bele buka aimoruk seluk ne’ebe bele kura moras ne’e, agora dadaun sira halo ida ne’e,” tenik DJ Soares.
Entretantu Prezidente Komisaun F (Saúde, Edukasaun, Jeneru no Veteranus), Deputadu Virgilio da Costa Hornai husu Ministeriu Saude fo atensaun lalais ba problema ne’e, tanba problema falta aimoruk akontese dalabarak ona.
“Iha fulan hirak liu ba, hau fo ona sujestaun ba ministeriu atu halo kompras emergensia ba aimoruk tanba ospital hotu presiza maibe la akontese ida ne’e,” dehan Prezidente Komisaun F ne’e.
Deputadu ne’e preokupa ho sistema kompras aimoruk ne’ebe agora direitamente husi Ministerio Saude ne’ebe liu husi mos prosesu aprovizionamentu, presiza tempu ne’ebe naruk.
Tanba ne’e ho esperiensia ne’ebe iha, fo hanoin ba ministeriu atu halo revizaun ba mekanismu sira ne’ebe iha, halo predisaun ida katak molok orsamentu aprova no promulga aimoruk sufsiente nafatin atu fo atendimentu ba pasiente sira kualker situasaun.
