Implementasaun Convention Right for Children durante ne’e iha Timor-Leste seidauk masimu tuir rekomendasaun ne’ebe sira (CRC) fo iha Jenebra kona ba protesaun direitu labarik iha Timor-Leste. 
Tuir Prezidente Komisaun Nasional Direitu Labarik (KNDL), Adalgiza Ximenes hateten iha tinan 2008 estadu Timor-Leste ba aprezenta relatoriu Konvensaun Direitu Labarik (KDL) iha Jenebra kona ba situasaun labarik iha rai laran liu –liu iha area saude, edukasaun, justisa no ben star.
“Implementasaun rekomendasaun sira ne’e seidauk masimu,” dehan Komisaria Adalgiza Ximenes, foin lalais, iha Colmera,Dili.
Nia dehan, iha rekomendasaun lubuk ida husi Convention Rigth for Children (CRC) Jenebra ne’ebe estadu Timor-Leste presiza implementa hodi proteje no garante direitu labarik hanesan, harii sentru detensaun ba labarik, lei justisa juvenile, tribunal ba familia, merenda eskolar, kastigu corporal inklui mos kona ba problema mal nutrisaun ba labarik ne’ebe seidauk resolve.
Agora dadaun, nia hatutan, KNDL halo hela peskiza kona ba asesu labarik iha saúde, edukasaun iha distritu rua hanesan distritu Oe-Cusse no Viqueque hodi identifika problema ne’ebe labarik sira hasoru iha area urbana no rurais bazeia ba alvu rekomendasaun ne’ebe iha.
Alem de ne’e, Komisaria informa,KNDL mos sei halo aprosimasaun ida ba iha labarik sira ne’ebe agora dadaun dadur hela iha prizaun Becora no labarik sira ne’ebe iha uma mahon tanba hetan violasaun seksual no seluk tan hodi identifika problemas labarik nain.
Hafoin ne’e, rezultadu peskiza no aprosimasaun sira ne’e KNDL sei haruka ba iha ministeriu relevante sira atu fo konsiderasaun tanba KNDL nia kompetensia atu fo hanoin governu.
Parte seluk, Prezidente Grupu Feto Parlamentar, Deputada Josefa Alvares konkorda ho KNDL katak governu seidauk iha seriadade atu implementa rekomendasaun sira ne’e relasiona ho problema labarik iha Timor –Leste.
Tuir nia, iha rekomendasaun sira ne’e husu atu estadu fo protesaun ba labarik sira ne’ebe hala’o servisu fa’an sasan iha dalan ninin, violasaun seksual, insestu, komete krime, edukasaun, no saúde maibe problema sira ne’e kontinua akontese.
“Hau hare sei iha labarik barak mak fa’an sasan, fase kareta iha estrada ninin buka osan ajuda inan aman, labarik barak mak sofre violasaun seksaul, labarik barak mak inan sira soe iha fatin-fatin seidauk iha atensaun masimu husi governu,” kestiona Deputada Alvares.
Nia hatutan, labarik sira kontinua hasoru problema tanba governu laiha planu no programa ida konkretu atu proteje labarik sira nudar sidadaun sira mos iha direitu hetan protesaun husi governu.
Tanba ne’e nia dehan, kuandu governu la investe ba labarik komesa agora, mak ba future Timor-Leste sei hasouru krizi rekursu humanu ne’ebe kualidade hodi harii nasaun ne’ebe prospero.
