Primeira Dama Isabel Fereira promete iha tempu badak sei harii uma provizoriu ida iha Ospital Nasional Guido Valadares ba inan isin rua sira husi distritus ne’ebe halo partus iha ospital hodi hela provizoriu hafoin partus.
Nia dehan, objetivu harii uma provizoriu ida ne’e tanba sala maternidade iha HNGV la sufsiente atu akomoda inan partus sira ne’e hotu.
“Kona ba inan sira mai husi distritu hau hanoin hela, se ida ne’e sai problema ne’ebe ita infrenta hau sei koalia ho emprezario balun ne’ebe laran diak hodi harii uma ida iha ne’e para inan sira ne’ebe mai husi distritu bele hela iha fatin ne’e,” promote Primeira Dama RDTL, Isabel Ferreira, (03/04), iha HNGV Bidau, Dili.
Nia mos husu ba Pesoal Saude sira, atu buka hatene mos vida moris inan sira nian bainhira partus iha fasilidade saúde no haruka dadus ba Gabinete Primeira Dama nian hodi fo tulun ba inan sira ne’e liu –liu labarik tanba realidade iha area remotas inan barak mak lakohi partus iha fasilidade tanba ekonomia uma laran fraku.
“Hau lembra bainhira hau halo vizita ba iha Ospital Distritu Same, parteira sira hateten inan barak mak lakohi partus iha ospital tanba laiha kondisoens, konserteza sira ba ospital lori saku oan ruma tau ropa sira nian laiha entau sira moe lakohi ba ospital,” dehan Primeira Dama Fereira.
Entretantu Diretor Jeral HNGV, Domingos Soares apresia ho inisiativa Primeira Dama nian, katak ema hotu liu-liu emprezario no sosiedade sivil sira iha interese tebes apoiu dezenvolvimentu seitor saúde nian.
“Fatin iha hela, ami nia tekniku sira sei halo proposta ida ba primeira dama hodi harii uma ida ne’e ba inan sira no familia sira ne’ebe mai husi do’ok hela ba hodi hein pasiente sira,” dehan DJ Soares.
Iha fatin hanesan Pesoal Saúde, Paulina Pinto hateten durante ne’e sira hato’o ona problemas sira ne’e ba ministerio relevante maibe seidauk realize tanba ne’e sira husu apoiu husi Primeira Dama nudar inan ba nasaun ida ne’e atu kria kondisoes ba inan feto sira atu tur ahi.
“Husu atu tau mos ba iha agenda permeira dama nian hodi fo atensaun ba ita nia inan feto sira ne’ebe mai husi do’ok nune’e mos bele utilize ba inan sira ne’ebe mai husi do’ok hodi hein oan sira moras,” tenik Pesoal Saude Pinto.
