Ministeriu Saúde estabelese ona sentru tratamentu Anti Retro Viral hamutuk hitu iha teritorio tomak, hodi fo atendimentu no kontrola saúdeba pasiente HIV/SIDA sira.
Tuir Xefe Interino Unidade Programa HIV/SIDA iha Ministeriu Saúde, Constantino Lopes katak moras HIV/SIDA konsidera sensitive no presiza atendimentu ne’ebe espesifiku mos.
Nia dehan, sentru tratamentu hitu ne’e kompleta ona ho Pesoal Saúde no Konseiladu treinadu iha area HIV/SIDA inklui mos fasilidade sira.
“Ita agora dadaun iha sentru ARV hitu mak estabelese ona iha Timor –Leste, rua iha Dili mak HNGV no Klinika Bairo Pite, lima iha Ospital Referral sira (Baucau, Suai, Oe-Cusse, Maliana no Maubisse) ita nia maluk sira ne’ebe sofre hela moras HIV/SIDA sira sei halo tratamentu iha fatin sira ne’e,” informa Xefe Interino Unidade Programa HIV/SIDA, (23/03), iha Dili.
Antes ne’e nia hatutan, Ministeriu Saúde (MS)mos estabelese ona sentru Volunteer Confidential Counselling Testing (VCCT) hamutuk 19 ne’ebe estabelese iha Sentru Saude sira inklui mos organizasaun balun atu halo teste ba ema ne’ebe hakarak hatene sira nia estatus ba moras HIV/SIDA.
Alende estabelese sentru VCCT, nia dehan ministeriu mos uza sistema mobile VCCT ne’ebe kompostu husi kareta 12 ne’ebe halao aktividade teste iha fatin sira ne’ebe seidauk estabelese sentru VCCT.
Iha parte seluk membru Komisaun F (Saúde, Edukasaun, Jeneru, Veteranus, Kultura no Igualidade Jeneru), Deputadu Eladio Faculto hateten, sentru tratamentu espesifiku ba pasiente HIV/SIDA ne’e importante maibe defende fali ba ema nia konsiensia atu halo tratamentu iha fasilidade saúde.
“Ami hatete ona katak sira tenke iha fatin ida atu sira halo tratamentu nafatin tanba iha aimoruk atu prolonga sira nia vida moris maibe depende ema ida –idak nia konsiensia,” dehan Deputadu Faculto.*
