Koordenadora Grupu Tais Feto Bobometo husi Distritu Oe-Cusse, Rosalina da Costa hateten, tais feto hirak ne’ebe sira fa’an ne’e sira rasik mak soru depois mai fa’an iha Dili.
“Durante ne’e ami fa’an ba ministeriu komersiu , gabinete prezidenti no ba kantor sira ne’ebé ami halo langganan, iha ne’e sira mai foti tanbá ami nia tais ne’e bele fase kuandu fo’er e tais ne’e bele halo ba saia, vestidu la hanesan ho tais ne’ebe fa’an iha market tais,” dehan Koordenadora da Costa, foin lalais, iha Mandarin, Dili.
Nia hatutan, durante ne’e sira ladun hetan rendimentu ne’ebe diak kompara ho tinan kotuk tanba ne’e husu ba governu atu kapasita sira.
“Ami husu tan treinamentu hodi hatene tan buat seluk, no buat saida mak ita hetan iha ema nia rai hakarak implementa tan no haburas rai ne’e,” Koordenadora ne’e sujere.
Nia mos informa, maske grupu ne’e hetan suporta husi Ministeriu Komersiu Industria maibe modál ne’e sira nian rasik.
“Tais sira ne’e nia folin hanesan selendang ida 10 dolares, tais mane 50 dolares no tais feto fa’an ho folin 45 dolares, folin ne’e latun no la sa’e,” tenik Koordenadora da Costa.
Entretantu membrus seluk husi grupu ne’e husu ba governu atu ajuda tan fasilidade balun ne’ebe sira presiza hodi soru sira nia tais rasik.
“ Ami husu ba governu atu aumenta tan mesin, armariu, ai, kabas ba soru tais ne’e, no ha’u senti triste loos tanbá loron ida ema la sosa kala semana ida ou rua mak foin ema sosa,” tenik Membru Grupu Tais Feto Bobometo, Margarina de Araújo.
Nia dehan, rendimentu ne’ebe sira hetan husi fa’an tais ne’e balun uza ba nesesidade uma laran, no balun hosi selu oan sira nia eskola.
Iha fatin hanesan, Lidia Rai dehan uluk antes misaun UNMIT remata, sira nia tais ema (malae) sosa barak, maibe agora ladun folin. “Malae se iha ne’e tais folin maibe agora laiha,”katak Lidia.
Iha parte seluk membru Komisaun D Parlamentar (Dezenvolvimentu no Ekonómia), Deputadu Adriano João husu ba governu atu bele hare kooperativas ki’ik sira ne’e, nune’e negosiante sir abele moris.
“Ami iha komisaun D fó ona hanoin ba Ministériu Sekretariu Estadu Meiu Ambiente no Sekretariu Kooperativa Industria hodi hare asuntu ne’e didi’ak no koloka maluk sira ne’ebé fa’an tais hodi bele regula fatin ba sira,” tenik Deputadu Joao.
Nia dehan, nu’udar reprezentante povu iha Parlamentu Nasionál, asuntu ne’e sira hato’o beik-beik ona ba iha ministeriu kompetente.
