Sekretariu Estadu Agua e Saneamentu no Urbanizasaun (SEASU), Elias Pereira Moniz rekonese katak komunidade tantu iha capital Dili no area rural sira barak mak seidauk hetan asesu ba bee moos.
“Ami sei kontinua servisu hamutuk ho doadores no parseiru dezenvolvementu ho stakeholder sira ne’ebe halo’o knar iha area bee moos nian, hodi nune’e bele mos kontribui ba selu tarifa bee moos nian,” dehan Sekretariu Estadu Elias Perreira Moniz, foin lalais, iha Kaikoli, Dili.
Durante ne’e nia dehan, Ministeriu Obras Publik (MOP) liu husi Diresaun Agua no Saneamentu servisu hamutuk doadores barak ona hanesan JICA hamutuk ho governu atu fo atensaun liu ba iha produsaun bee moos iha area urbana hanesan konstruksaun ba tanki, no mos fo kapasitasaun Timor oan sira.
Entretantu ajensia internasional AusAid hamutuk ho governu atu hare liu ba sistema bee moos iha area rurais, no mos Unicef ne’ebe maka fo atensaun liu ba kapasitasaun ba planu emergensia iha area urbana ho dezenvolvementu iha area rurais, tenik Sekretariu Estadu ne’e.
Nia dehan, la’os ne’e deit, iha mos NGO internasional sira hanesan OXFAM, Water Aid, Plan Internasional, CFTL, World Vision no mos NGO nasionais sira seluk tan.
Iha fatin hanesan, Sekretariu Estadu Obras Publiku (SEOP), Luis Vaz Rodrigues hateten, Timor Leste iha bee barak maibe seidauk organiza bee ho didiak.
“Tanba ne’e ohin hau koalia ho ita nia parseiru dezenvolvementu husi rai seluk ne’e, atu sira halo master plan, atu nune’e bele identifika lolos ita nia bee ne’e iha zona hira maka iha bee,” dehan SE Rodrigues.
