Diretora Ezekutivu Fundasaun Alola (FA), Teresa Verdial de Araujo hato’o preokupasaun ne’e bainhira realize seminariu nasional ho tema ‘promove direitu feto iha setor privadu, hare husi implementasaun lei laboral ne’ebe iha.
Nia dehan, seminario ne’e realize ho objetivu atu loke ema hotu nia hanoin tanba iha grupu balun ne’ebe vulneravel tebes hasoru violensia no diskriminasaun e presiza hetan atensaun.
Nia dehan lolos seminario ne’e sei iha informasaun liu husi deklarasaun ne’ebe fo sai husi trabalhadora (sasin) maibe la marka prezensa tanba tauk lakon servisu.
“Se nia (empregado) hatene nia dever hanesan ema ne’ebe fo servisu ba trabalhadores sira no komprende diak konaba lei nia haruka mai deit se nia lahalo sala tanba sa nia tenke ameasa ema atu koalia lialos se o ba o la hetan servisu,” preokupa Diretora ezekutivu FA, Teresa Verdial de Araujo, foin lalais, iha Salaun Asosiasaun HAK, Dili.
Nia hatutan katak informasaun ne’ebe sira hetan husi trabalhadora ne’e mak “Se hau lakon servisu Alola mak fo hau serviru ka” ne’e problema bo’ot ne’ebe presiza fo atensaun seriu.
Nia informa, tuir lolos iha keisa barak konaba violasaun no diskriminasaun ne’ebe feto sira hasoru iha servisu fatin maibe tanba feto sira tauk lakon servisu entau keisa oituan deit maibe feto barak mak hetan violasaun no diskriminasaun iha servisu fatin la’os oituan deit hanesan negosiante Cina sira fo servisu ba feto sira hamrik loron tomak maske isin rua ho osan $40,00.
Entretantu, Adjuntu Provedoria Direitus Humanus e Justisa (PDHJ), Silverio Baptista Pinto hateten Timor –Leste iha konstituisaun no tratadus ne’ebe ratifika ona fo garantia ba ema hotu iha liberdade liu –liu trabalhadores sira atu halibur an iha sindikatu no organizasaun ne’ebe atu defende sira nia direitu tanba ne’e prinsipiu no direitu baziku ida ba trabalhadores sira.
Nia dehan seminario ne’e importante tebes ba trabalhadora sira atu koalia sai violasaun no diskriminasaun ne’ebe sira hasoru iha servisu fatin tanba iha seminario ne’e partisipa husi Sekretario Estado Politika Formasaun Profesional e Empregu, Konfederasaun Sindikatu Timor –Leste (KSTL) no emprezario balun entau sira bele sama atensaun kedas ba empregado sira ne’e labele tauk koalia lia los.
“Hau hanoin katak ne’e laos rajaun para sira tauk tanba tuir lolos sira tenke kualia sai baut ne’ebe sira hasoru,” dehan Adjutu Silverio.
Entretantu Paula Santos, nudar emprezaria no responsavel ba Carpintaria Univen rekonese katak feto barak mak hetan violasaun no diskriminasaun iha servisu fatin tanba sosializasaun ba lei laboral rasik seidauk maximu no empregadu barak mak falta informasaun.
Tuir nia hare katak violasaun no diskriminasaun sira ne’ebe durante ne’e akontese ba trabalhador sira liu –liu feto sira ne’e maioria husi empregadu sira husi Estrangeirus maibe la signifika katak emprejario local sira laiha.
“Durante ne’e hau nia kompania la akontese ida ne’e,” dehan Emprezaria Paula.
