Xefe Gabinete Sistema Informasaun Saude (SIS) iha Ministeriu da Saúde (MS), João P. A. da Silva katak iha tinan 2012 iha labarik nain 47,360 (25,7 %) mak mai tetu iha fasilidade saúde kada fulan no husi numeru ne’e mak identifika labarik nain 3,867 (8,2%) mak hetan mal nutrisaun grave liu.
“Ne’e ida mal nutrisaun grave ka todan, seidauk konta ho mal nutrisaun moderadu, se labarik sira ne’e mak mai tetu hotu karik, nia numeru la’os ida ne’e deit, numeru bele as liu ida ne’e,” dehan Xefe SIS, João da Silva, foin lalais, iha Kaikoli, Dili.
Entretantu dadus iha Departamentu SIS iha tinan 2011, labarik ho idade (0-9) labarik hamutuk nain 34,550 mak tetu iha fasilidade saúde, e husi numeru ne’e iha labarik nain 4,529 (10,4 %) mak sofre mal nutrisaun grave.
Numeru ne’e sei aumenta bainhira komunidade sira iha ona konsiensia atu lori labarik sira ba tetu iha fasilidade saúde kada fulan, tanba numeru sira ne’ebe iha bazeia ba labarik sira ne’ebe mai tetu iha fasilidade saúde la’os labarik hotu.
Tuir rezultadu demography health survey tinan 2009-2010 hatudu katak kazu mal nutrisaun iha Timor –Leste as.
Nia sublinha, mal nutrisaun iha tipu klasifikasaun tolu mak hanesan klasifikasaun labarik ho kondisaun badak hamutuk 58%, krekas hamutuk 19% no todan menus hamutuk 44%.
Ministeriu halo ona esforsu atu redus taxa mal nutrisaun iha rai laran liu husi programa fahe aihan (batar uut, vitamina A) ba inan isin rua, halo sosializasaun edukasaun ba komunidade kona ba kualidade aihan ne’ebe ho nutrisaun diak ba labarik nia saúde, tenik Xefe Gabinete SIS.
Iha parte seluk Xefe Departamentu Programa Nutrisaun, João Bosco hateten problema mal nutrisaun laiha mudansa no kontinua as maske governu halo ona intervensaun bar-barak.
Maske nune’e nia afirma, ministeriu iha ona planu estrategiku nasional atu kombate mal nutrisaun iha rai laran hanesan hasa’e estatutu nutrisaun, kapasita rekursu humanu, dezenvolve programa intervensaun.
“Mas kombate mal nutrisaun la’os kestaun Ministeriu Saúde deit maibe setor hotu-hotu hanesan tratamentu inan isin rua, asesu bee moos, asesu ai han tanba ne’e programa multi sektoral,” dehan Xefe Bosco.
Nia dehan, ministeriu sei halo advokasia no sosializasaun ba komunidade to’o iha nivel sukus kona ba demostrasaun ai han local, kualidade susu been inan nian, tratamentu nutrisaun no sistema distribuisaun ai han (batar uut) ba inan isin rua sira.
