Atual Sekretariu Jeral Partidu Fretilin sujere ba Sekretariu Estadu Komunikasaun Sosial atu kria Sentru Formasaun Jornalismu nian antes sai jornalista, nune’e sira bele iha konesementu diak area jornalismu nian.
Mari Alkatiri, Sekretariu Jeral Partidu Fretilin ne’ebe sai orador iha seminariu internasional kona ba esbosu Lei Komunikasaun Sosial ne’e dehan, katak atu manan sentidu de responsabilidade importante tebes kria sentru formasaun jornalismu ketak ida, la’os orgaun komunikasaun sira mak fo fali sertifikadu ba ema ida sai jornalista.
Tanba tuir nia, realidade durante ne’e organizasaun komunikasaun sira mak fo formasaun durante fulan tolu no halo estagio durante fulan neen iha orgaun komunikasaun seluk, e ikus mai fo kontratu nudar jornalista tanba relasaun familia.
“Hau halo proposta loke sentru formasaun jornalista, kursu tinan ida ka rua foin halo estagio iha orgaun komunikasaun, se ita hakarak seriu harii jornalismu ida professional duni ita tenke harii buat ida ne’e,”sujere Marii Alkatiri, bainhira sai orador iha seminario internasional, (22/03), iha Hotel Timor, Dili.
Maske nune’e, nia dehan, la signifika katak jornalista sira agora laiha kapasidade tanba ema moris nia kapasidade sempre la to’o tanba ne’e husu jornalista sira atu lor-loron aprende nafatin liu –liu sosiedade ida dinamika hanesan Timor –Leste.
Entretantu orador internasional husi Portugal no Indonesia (Adelino Gomes no Mario Antonio) informa katak atu harii jornalismu ne’ebe profesionalismu importante harii sentru formasaun jornalismu nian.
“Hau la konkorda bainhira organizasaun media sira mak fo fali sertifikado ba ema ida atu sai jornalista, hau konkorda bainhira sentru formasaun jornalismu ida mak fo sertifikado ba ema ida atu sai jornalista,” dehan Jornalista Senior husi Portugal, Adelino Gomes.
Hatan ba kestaun sira ne’e Sekretariu Estado Komunikasaun Sosial, Nelio Isaac konsidera ideas sira ne’e importante tebes ba setor komunikasaun sosial iha Timor-Leste e sekretario estado aponta ona hanoin sira ne’e atu tau iha planu hodi dezenvolve setor komunikasaun sosial.
“Ida ne’e mos ideas diak ida atu ita tau iha lei komunikasaun social tanba iha artigu ida preve ona katak atu sai jornalista tenke halo estagio lai iha orgaun komunikasaun sosial,” dehan Sekretariu Estadu Issac.
