Laura Soares Abrantes,Reprezentante Movimentu Feto hateten, estudante sira nudar jerasaun foun presiza hatene asuntu jeneru ho diak tanba Timor-Leste to’o agora sei iha disigualidade, diskriminasaun no violensia kontra feto sei maka’as.
“Ida ne’e asuntu bo’ot ida ne’ebe tenke tau iha kurikulum nasional, komesa husi ensino baziku to’o ensino superior,” sujere Laura Abrantes,Reprezentante Movimentu Feto, (12/03), bainhira partisipa seminariu ho tema Edukasaun ho Abordazem Jeneru, iha salaun Auditoriu, Liseu, Dili.
Nia dehan, iha ensino baziku bele integra deit ho materia sira ne’ebe relevante atu labarik sira komprende kontestu jeneru maibe ensino sekundariu no superior tenke iha disiplina apropriadu duni ba jeneru.
Hatan ba kestaun ne’e Vise Ministra Edukasaun Ensino Baziku, Dulce Soares katak Ministerio Edukasaun (ME) sei halo revizaun ba kurikulum nasional ne’ebe implementa ona durante tinan lima hodi hare fila fali iha duni materia balun ne’ebe perspetiva jeneru.
Nia hatutan,karik sei hatam asuntu jeneru iha kurikulum, sei foka liu kona ba istoria resistensia, liu-liu luta heroina sira,sira nia situasaun moris inklui atividade no direitu feto nian.
Tanba tuir nia iha material balun mak mensiona kona ba igualidade jeneru hanesan estudu du meiu, sidadania no material direitus humanus.
“Hau hanoin ita tenke servisu hamutuk ho organizasaun relevantes sira atu hatama asuntu sira hanesan ne’e iha revizaun kurikulum atu integra iha ensino hotu-hotu,” dehan Vise Ministra Soraes.
Alem de ne’e nia afirma, ME mos iha ona programa seluk hanesan sei hasa’e asesu feto iha nivel edukasaun, numeru profesora no hadia mos moduls formasaun ba profesores sira atu sensivel ba jeneru.
“Hodi prepara no enkoraja labarik feto sira atu brani foti desizaun ba sira nia moris rasik,” tenik Vise Ministra Soares.
