Diretor Jeral Sekretariu Estadu Politika Formasaun Profesional no Empregu (SEPFOPE), Jacinto Gusmao, sei aloka orsamentu ba planu ida ne’e tanba Lei du Trabalhu No.4/2012 ne’e seidauk to’o ba ema hotu.
Nia dehan, lei ne’e rasik aprova iha 22 Fevereiru tinan 2012 no implementa iha 22 Junu 2012 tanba ne’e sira laiha preparasaun hodi sosializa lei ne’e ba ema hotu.
“Ami tau la to’o 20 mil dolares, tanba tenke la’o hamutuk ho sira seluk hanesan Kamara Komersiu sira mak tenke halo iha kompania sira, la’os ami mesak, ita hotu tenke hala’o sosializasaun ne’e,” dehan Diretor Jeral Jacinto Gusmão, bainhira sai orador iha seminariu nasional ho tema ‘promove feto iha setor privadu, hare husi implementasaun lei kodigu laboral’, iha Salaun Asosiasaun HAK, Farol,Dili.
Tanba ne’e, nia hatutan, SEPFOPE sei servisu hamutuk ho sindikatu trabalhu no Kamara Komersiu inklui sosiedade sivil sira atu fo atensaun ba disputa laobral sira ne’ebe akontese ba trabalhador sira.
Iha parte seluk, Diretora Ezekutivu Fundasaun Alola (FA), Tereza Verdial de Araujo husu atu governu esforsu an kria mekanismu ne’ebe diak ba implementasaun lei laboral ne’e atu garantia trabalhador sira nia direitu tanba trabalhador liu –liu feto sira barak mak servisu iha setor privadu.
Nia mos sujere, SEPFOPE servisu hamutuk ho sosiedade sivil sira atu popularize artigu pur artigu husi lei laboral ne’e ba ema hotu liu –liu trabalhador sira atu komprede sira nia direitu no dever nune’e mos emprezario sira.
Tanba tuir nia, realidade emprezariu sira balun to’o agora laiha konesementu atu uza lei ne’e hanesan gia ida hodi promove direitu trabalhador nian.
“Ami focus ba tinan rua mai, ami servisu hamutuk ho SEPFOPE atu halo advokasia liu –liu implementasaun lei no analiza ba lei ne’e ho perspetiva Konvensaun Halakon Forma Diskriminasaun Hotu –hotu hasoru Feto (CEDAW),” dehan Diretora de Araujo.
