Alzira Reis, Jerente Programa Advokasia iha Fundasaun Alola (FA) hateten sira halo ona meius barak hanesan liu husi fahe pamfletu, fo treinamentu inklui halo talk show durante ne’e ba komunidade sira maibe la efetivu hotu.
“Ami sente katak mekanizmu ida ne’e efetivu liu duke ita hasai osan barak print pamfletu fahe ba sira mos ladun lee, osan iha ita selu grupu ida ba halo drama, ita asisti no esplika ba komunidade,” dehan Jerente Programa Advokasia Fundasaun Alola, Alzira Reis, iha Mascarenhas, Dili.
Nia dehan, komunidade sira gosta liu hare direitamente aktu trafiku umanu ne’ebe akontese, duke lee.
Nia hatutan, distritu lima mak sira uza meius drama ne’e halo sensibilizasaun kona ba prevensaun no perigu husi trafiku umanu, mak Distritu Viqueque, Baucau, Manatuto, Ainaro no Distritu Ermera inklui mos fo kapasitasaun ba lideransa local sira iha 13 distritus.
Bazeia ba peskiza FA nian iha tinan 2004 kona ba programa anti trafficking iha Timor –Leste hatudu katak Timor –Leste nudar nasaun destinasaun ba trafiku umanu husi nasaun Asia hanesan (Filipina, China, Australia, Indonesia).
Nia afirma, maske seidauk identifika lolos katak Timor oan la sai vitima trafiku umanu maibe realidade trafiku domestiku buras ba beibeik liu –liu labarik feto minoridade sira.
“Ami identifika labarik vulnerabilidade nain rua sai vitima ba trafiku umanu iha tinan 2011-2012 ne’ebe nia kazu agora dadaun iha prosesu laran,” tenik Jerente Reis.
Entretantu Diretora Nasional Reinsersaun Sosial, Antonia Carmen da Cruz rekonese katak violasaun trafiku domestiku ne’ebe barak mak akontese iha rai laran maibe difisil atu identifika tanba ema barak mak seidauk iha konesementu konaba trafiku humanu rasik no tauk fo informasaun.
Nia dehan Governu hamutuk ho parseirus sira nafatin halo kampania prevensaun ba violensia trafiku humanu ba lideransa local liu –liu familia sira atu protese oan feto sira husi tentasaun sira ne’ebe ema seluk lohi atu hatama sira iha eskola no fo sira servisu.
“Ita sente katak iha barak liu distritu ida ba distritu seluk maibe ami seidauk identifika kazu no kazu ne’ebe mos,” dehan Diretora Carmen.
Nia hatutan, meius ne’ebe Ministerio Solidaridade Sosial (MSS) hamutuk ho Sosiedade Sivil sira uza atu sosializa komunidade sira kona ba prevensaun no identifikasaun trafiku umanu mak liu husi Televizaun, radio komunidade iha 13 distritus, formasaun ba lideransa local sira no tau planfetu sira iha fatin publiku.
