Antonia Carmen da Cruz, Diretora Nasional Reinsersaun Sosial (DNRS) iha Ministeriu Solidaridade Sosial (MSS) rekonese numeru vitima violensia bazeia ba jeneru barak tebes iha Casa Vida, liu –liu labarik minoridade sira.
“Los duni realidade hatudu katak uma mahon atu simu labarik vitima sira ne’e ita iha deit ida mak Casa Vida entaun ami buka hela oinsa atu servisu hamutuk ho Casa Vida,” dehan Diretora DNRS Antonia Carmen da Cruz, iha Bemori, Dili.
Nia dehan, atu halo uma mahon ne’ebe permanente presiza halo estudus ne’ebe klean.
Iha parte seluk, Koordenadora Uma Mahon Casa Vida, Domingas Soares informa katak sira iha ona planu atu kria tan uima mahon ida iha tinan ida ne’e tanba vitima sira barak liu mak hela iha Uma Mahon Casa Vida durante ne’e.
“Ami seidauk tuir standarte governu nian tanba ami nia vitima sira ne’ebe ami akomoda agora dadaun iha 55 pesoas, ami iha uma mahon hat kada uma mahon ami aloka vitima nain lima, tolu no nain 14,” informa Koordenadora Soares.
Hatan ba kestaun ne’e Diretora DNRS, Antonia Carmen da Cruz katak governu sei hare ba situasuan Uma Mahon Casa Vida maibe la’os tinan ida ne’e.
“Tanba atu harii uma ida presiza prosesu administrativa lubuk ida hanesan rai, ka fatin, entaun adia fali ba tinan 2014 maibe apoiu ba programa seluk nafatin la’o tuir proposal ne’ebe iha,” tenik Diretora da Cruz.
Alende fo apoiu finanseiru ba organizasaun sira ne’ebe fo asistensia ba vitima sira governu mos nafatin dezenvolve politika koperasaun servisu ho familia no komunidade atu protese violensia hasoru feto no labarik nune’e mos vitima sira.
Enkuantu total uma mahon ne’ebe agora eziste iha Timor-Leste hodi akumula vitima violensia bazeia ba jeneru inklui vitima labarik hamutuk hitu, mak Uma Mahon Rogerio iha Distritu Lospalos, Uma Mahon Paz iha Baucau, Casa Vida no FOKUPERS iha Dili, Salele iha Suai, Maria Tapo iha Maliana no Uma Mahon ida iha Distritu Oe-Cusse.
