Deputada Domingas Alves da Silva alias Bilou-Mali, husi bankada Congresu Nasional Rekonstrusaun de Timor (CNRT) preokupa tanba Deputada Benvinda Catarina Rodrigues no Maria Adozinda la tuir iha sigunda sesaun plenaria Parlamentu Nasional.
“Sira nain rua ne’e dehan reprezenta povu, reprezenta nia partidu agora laiha, ne’e diak ka lae,” preokupa Deputada Domingas Alves da Silva alias Bilou-Mali, foin lalais, iha PN.
Tuir nia, kuandu Deputadu/a sira husi bankada CNRT mak abandona plenaria sei diak oituan tanba iha ema barak, maibe sira nain rua deit mos laiha, ne’e oinsa.
“CNRT ne’e ema barak ne’ebe balun sai, balun hela mos diak,” tenik Deputada Bilou-Mali.
Relasiona ho kestaun ne’e Deputadu husi bankada Fretilin, Eladio Faculto sujere kedas ba meja Parlamentu atu hare rejimentu parlamentu nian hodi regula deputadu sira ne’e.
“Se mak sai husi ne’e prezidenti hare kedas,bolu nia mai, samada atensaun kedas iha ne’e,” Deputadu Faculto sujere.
Deputadu Faculto ameasa katak, bainhira Prezidenti Parlamentu la fo sansaun ba deputadu sira ne’e, maka iha loron ida sira sei abandona plenaria. “Prezidenti la fo sansaun ba sira, ami mak hamrik sai fali,” ameasa Deputadu Faculto.
Hatan ba preokupasaun ne’e Prezidenti Ezersisiu, Adriano do Nascimento husu ba deputadus hotu tenke tuir rezimentu ne’ebe iha.
“Plenaria hahu tuku 9:00 dader to’o meudia tuku ida, ne’ebe sujestaun sira ne’e ami konsidera,” dehan atual Vise Prezidente PN ne’e.
Enkuantu hatan ba lamentasoens hirak ne’e Xefe bankada Frente Mudansa, Deputadu Benvinda Catararina justifika katak, nia parte la marka prezensa iha plenaria iha momentu ne’eba tanba hala’o servisu bankada ninian.
“Ne’ebe hau justifika tiha ona ba Parlamentu, la presiza koalia tan,” tenik Deputada Rodrigues.
