“Ema liu 50% hateten katak sira la komprende saida maka korupsaun,” dehan Prezidente Komisaun Anti Korupsaun (KAK), Komisariu Aderito de Jesus Suares, (19/02), iha Farol, Dili.
Tuir nia, ne’e hanesan servisu bo’ot ida ba institusaun KAK atu oinsa bele hasa’e konesementu komunidade sira nian kona ba asuntu ne’e.
“Ne’ebe ami nia ema iha ne’e, iha divizaun investigativu, ida prevensaun no edukasaun kampania, iha tinan kotuk mos ami vizita distritu lubuk ida atu bele fo edukasaun kona ba asuntu ne’e, maibe dalaruma public ladun fo valor, public hakarak maka atu hatene KAK kaer ema hira ona,” preokupa Komisariu KAK ne’e.
Nia afirma, iha tinan ida ne’e mos KAK sei iha programa nafatin atu tama iha komunidade nia le’et atu fo konesementu kona ba saida mak korupsaun.
“Fulan ida ne’e nia laran, ita halo’o iha 25 eskolas, no ami mos involve joventude no lider komunitaria sira atu sira mos bele involve oinsa atu kombate korupsaun,” dehan Komisariu Suares.
Iha lidun seluk Deputadu Inacio Moreira katak, koalia kona ba korupsaun ne’e konserteza ema hatene maibe dalabarak ema la kompriende maka lala’ok korupsaun ne’e oinsa.
“Korupsaun kolusaun no nepotismu nia hahalok ne’e oinsa, ne’e ema la hatene, maibe ema kolia dehan na’ok ten ne’e karik ema bele kompriende,” dehan Deputadu Moreira.
Tanba ne’e nia sujere, wainhira fo treinamentu ruma ba komunidade presiza uja lingua ne’ebe maka ema bele kompriende ho lalais.
“Koalia ho liafuan ne’ebe maka simples, pur ezemplu hanesan dehan konflitu de interese, depois halo servisu ne’e buka familia deit ne’e maka temi dehan nepotisme, sei karik esplika hanesan ne’e ema bele kompriende ho lais,” sujere Deputadu ne’e.
