Iha fulan Abril tinan ne’e, Primeiru Ministru hamutuk ho Sekretariu Estadu nain hat sei hala’o konsulta publiku iha distritu 13 kona ba estabelesementu Kamara Municipiu iha distritus.
Ministru Administrasaun Estatal (MAE), Jorge da Conceicao Teme hateten, Primeiru Ministru akompanha ho Sekretariu Estadu Desentralizasaun Administrativa, Sekretariu Estadu Dezenvolvementu Lokal, Sekretariu Estadu Apoiu Setor Privadu no Sekretariu EStadu Fortalesementu Instituisional inkui tekniku sira husi STAE hodi esplika ba komunidade sira,liu-liu iha Distritus ne’ebe implementa uluk Kamara Munisipiu (KAMUS).
“Iha 1 de Abril senhor Primeiru Ministru ho Sekretariu Estadu sira tun hodi esplika kona ba objetivu hari komisaun instaladora munisipiu,”hateten Ministru Administrasaun Estatal,Jorge da Conceicao Teme, (07/02).
Tuir nia, konsulta publiku ne’e sei hala’o uluk iha distritu hirak ne’ebe implementa uluk KAMUS iha primeira faze mak Distritu Oe-Cusse, Bobonaro, Baucau no Distritu Dili.
“Ita nia preparasaun munisipal sei naruk, tanba eleisaun munisipiu sei hala’o iha 2014,” dehan Ministru Teme.
Nia dehan, edifisius ba Kamara Munisipiu rasik agora dadaun pronto ona iha distritus hirak ne’e, hanesan iha Distritu Dili oras ne’e dadauk Ministeriu Komersiu Industria e Ambiente mak okupa temporariamente, iha Bobonaro Admistrasaun Distritu mak okupa hela, nune’e mos iha Distritu Baucau no Oe-Cusse.
“Wainhira to’o ona loron eleisaun hotu, prezidenti kamara ho nia komponentes tomak sira sei tama okupa fali,” Ministru Teme katak.
Iha fatin hanesan Primeiru Ministru Kay Rala Xanana Gusmao hateten, iha tinan ne’e sira sei estabelese kuadrus normativu ba munisipiu nian.
“Iha Abril ne’e hodi bele deside hamutuk modelu ida ne’ebe adekuadu liu ba nesesidades Timor oan nian hafoin mak hahu kria komisoens instaladoras munisipais iha distritu 13,” hateten PM Gusmao.
PM Gusmao hatutan, kriasaun munisipiu sei hakbesik administrasaun publika ba sidadaun hodi promove prestasaun servisu publiku ne’ebe bele impulsiona liu tan kresimentu sosial no ekonomiku.
Nia afirma, Programa Dezenvolvimentu Lokal,Planu Dezenvolvimentu Sukus ho programa kona ba Dezenvolvimentu Desentralizadu ne’ebe hahu iha tinan 2010.”Ajuda ona administrasaun lokais no distritais atu familiariza ka hatoman an ho prosedimentu sistemas ba asoens planeamentu nian,”PM Gusmao katak.
