Ministeriu Edukasaun ba tinan ida ne’e preve deit $12 milioens ba programa merenda eskolar iha ensino baziku hotu maibe Membru Parlamentu Nasional konsidera orsamentu ida ne’e ki’ik liu no la sufsiente.
Tuir Prezidente Komisaun F ne’ebe trata asuntu edukasaun, saude, veteranus , kultura no igualidade jeneru, Deputado Virgilio da Costa Hornai katak programa merenda eskolar importante ba labarik sira no tenke iha nutrisaun diak, nune’e bele redus mal nutrisaun iha rai laran.
Prezidente Komisaun F ne’e dehan, Ministeriu Edukasaun iha politika diak hodi garante kualidade merenda eskolar maibe alokasaun orsamentu mak la kondis ho planu ne’ebe iha.
“Ami preokupa tanba problema mal nutrisaun sei as iha ita nia rai, e atu redus presiza iha orsamentu ida responde ba politika ne’ebe iha,” preokupa Prezidente Komisaun F Parlamentar, Deputadu Virgilio da Costa Hornai, (05/02), iha Parlamentu Nasional.
Nia hatutan, kada estudante ida hetan $0.15 sentavus enkuantu governu preve deit $12 milioens ba programa merenda eskolar, ne’e ki’ik no sei la resolve problema merenda eskolar.
Entretantu Ministru Edukasaun, Bendito Freitas hateten programa merenda eskolar importante tebes atu kontribui ba dezenvolvimentu nutrisaun ba estudantes sira.
“Tanba ne’e iha kintu governu ne’e sei esforsu atu melhora diak liu kualidade prestasaun servisu no atendimentu merenda eskolar,” dehan Ministru Freitas.
