Vise Primeiru Ministru (VPM), Fernando Lasama de Araujo hato’o kestaun ne’e relasiona ho fasilidade eskola ne’ebe dalabarak tau iha eskola laran maibe la kleur lakon no governu tenke hasai osan hodi sosa tan fasilidade foun.
“Kuandu fasilidades eskola nian mak lakon, hotu-hotu tenke tama sai uma buka, nune’e bele tau fali iha nia fatin. Se la’e balu-balun la lori fila mai tau tiha iha ne’eba,lamenta nafatin iha Governu dehan kadeira la to’o nafatin,tau osan kadeira la sosa,karik ministru naok tiha osan kadeira nian karik,padahal tun ba iha karaik imi mak naok fali,” hateten Vise PM, Fernando Lasama de Araujo, foin lalais,iha Sentru Convensaun, Dili.
Vise PM dehan, eskola la’os deit responsabilidade Professor ka Ministru Edukasaun sira nian maibe komunidade hotu atu kuidadu sasan ne’ebe iha eskola laran.
“Se eskola laiha imi nia oan sai beik nafatin hanesan ita nia avo sira,ferik katuas sira kous hau ne’e beik (buta huruf), se la funsiona ho diak situasaun ne’e sei mosu nafatin,” dehan Vise PM ne’e.
Iha sorin seluk Prezidenti Komisaun F Parlamentar,Deputadu Virgilio da Costa Hornai sente preokupa tanba tinan –tinan tau osan ekipamentu ba mobiliariu maibe ikus mai kontinua lakon.
“Hau mos aseita Vise primeiru ministru nia hanoin katak,uluk iha tempu Indonesia nian ita iha osan oituan deit mais problema meja kadeira ladun iha problema,” dehan Deputadu Hornai.
Prezidente Komisaun F ne’e mos preokupa tanba to’o agora kuaze eskola hotu laiha moru protesaun tanba ne’e ema ho livre naok fasilidade eskola nian.
“Ita nia difikuldade mak ne’e ,primeiru ita nia eskola sira moru la iha,sigundu ita la tau seguransa,hau hanoin buat sira ne’e kontribui hotu ba fasilidade sira,”Hornai dehan.
Deputadu ne’e mos husu ba inan aman sira atu tau matan ba eskola sira tanba liu husi eskola mak oan sira sai matenek.
Iha parte seluk,Diretor da Eskola Sekundariu 4 de Setembru, Alberto da Costa Braz hateten, sira nia eskola durante ne’e la lakon buat ida tanba iha kooperasun diak ho komunidade sira ne’ebe hela besik iha fatin ne’eba.
“Ami nia eskola ne’e kadeira no meja la lakon so at mak iha,”Diretor Braz.
