Ministru Saude, Sergio Lobo hateten Orsamentu Jeral Estadu ba tinan ne’e (2013) ministeriu propoin $61,508 mil, ne’ebe sei uza ba hadia fasilidade saude iha area remotas, kolokasaun medikus inklui sira nia rezidensia.
“Ami sei harii postu saúde kuaze kuatru sentus iha teriotorio tomak, nune’e bele fo atendementu ne’ebe diak no ho kualidade ba povu,” dehan Ministru Saúde, Sergio Lobo, (05/02), iha Parlamentu Nasional.
Entertantu Membru Komisaun F ne’ebe trata asuntu Saúde, Edukasaun, Igualidade Jeneru, Deputada Ilda Maria da Conceição konsidera planu sira ne’e inkonsistensia tanba planu atu harii postu saúde kada sukus iha teritorio tomak maibe la tau osan ba planu sira ne’e.
“Ami kestiona maka’as tanba laiha konsistensia ba planu ida ne’e, iha duni atu hari 52 postu saude iha sukus sira maibe seidauk aloka orsamentu, no tinan ida deit la kosege hari hotu,” dehan Deputada ne’e.
