Tuir Xefe Unidade Banku de Sangue Nasional (BSN), Arsenio Jose Alves Guterres katak, hahu Janeiru to’o agora sira seidauk bele hala’o atividade doasaun ran husi instituisaun governu no universitario sira tanba stok aihan laiha.
“Ami kansela hotu orario doasaun ran iha instituisaun hanesan kandidatu bombeirus distritu Viqueque nian no individu sira tanba stok susu been milo, aqua no biskuat atu fo ba donor sira han hodi rekopera fila fali sira nia kondisaun saúde laiha ona,” dehan Xefe BSN, Arsenio Jose Alves Guterres, (06/02), iha knar fatin Bidau, Dili.
Nia hatutan, agora dadaun sira hato’o ona proposta ba iha Ministeriu Saude, husu orsamentu ho montante$ 4.000 resin hodi kompra aihan sira ne’e nune’e bele hala’o aktividade doasaun ran liu –liu iha Komponente naval sira ne’ebe ho kuantidade bo’ot.
Alende stok aihan, BSN mos infreta limitasaun ba plastic tabung hodi tau ran inklui mos freezer for fresh fronzen plasma (jelera tau stok ran plasma) ne’ebe avaria durante fulan tolu ona.
Iha parte seluk, Membru Komisaun F ne’ebe trata asuntu Saúde, Edukasaun, Igualidade Jeneru, Deputada Maria Adozinda Pires da Silva hateten orsamentu atu preve ba problema sira emergensia hanesan ne’e iha maibe nia prosesu ne’e mak demora liu tanba ne’e tenke halo pedidu ne’e antes.
“Ami sei koalia ho Ministerio Saúde atu halo intervensaun lalais tanba aktividade BSN ne’e importante tebes atu halo doasaun hodi ajuda pasiente sira ne’ebe presiza ran,” dehan Deputada Pires.
