Deputadu Paulino Monteiro preokupa tebes tanba iha fiskalizasaun ne’ebe sira halo ba eskola hotu iha rai laran, deskobre katak iha duni professor permanente balun lor-loron la tama hanorin maibe to’o fulan sira simu osan.
“Hau hakarak koalia momos kona ba osan 10 miloens ne’ebe mak selu ba profesor sira,ba professor ida ne’e, ba professor voluntariu,” preokupa Deputadu Paulino Monteiro, iha Parlamentu foin lalais ne’e.
Tuir dadus ne’ebe tama iha Ministeriu Edukasaun, iha Komisaun Funsaun Publiku no Ministeriu Finansas professor kontratadus hamutuk nain 3.972 ne’ebe kobre iha Timor tomak.
“Agora ho numeru ida ne’e Ministeriu da edukasaun iha planu orsamentu jeral do estadu 2013 propoin atu prosesa sira ba ona estatus nebe ke dignu, sai funsionariu permanente atu bele hanorin,” dehan Ministru Edukasaun, Bendito Freitas.
Maibe tuir nia, presiza halo estudu klean atu bele konfirma lolos profesor voluntariu sira ne’e. “Nune’e it abele evita professor mate klamar sira ne’e,”
Nia dehan, total profesor permanente ne’ebe uluk hanorin iha Portugues nia tempu to’o mai agora hamutuk 600 e tal profesores.
Iha sorin seluk deputadu,Eladio Faculto sublina katak,iha orsamentu jeral do estadu 2013 Governu iha ona hanoin atu hare konaba professor voluntariu sira maibe orsamentu fiksu lolos sidauk tau.
“Realmente sira seidauk halo estimasaun orsamentu ida atu aloka ba profesor voluntarius sira ne’e tanba sira hanoin atu halo tan levantamentu dadus oinsa bele hatene numeru lolos profesor nian hira”Faculto hateten.
Deputadu ne’e afirma tan katak,profesor voluntariu ne’e la’os 3.972 ne’e deit maibe bele aumenta tan.
“Iha ami nia diskusaun komisaun F ne’e mos hare situasaun balun ke dalaruma funsionariu balun nebe la ativu ona mos sira tau nafatin funsionariu permanente,” Deputadu Faculto tenik.
