“Sira iha emosaun negativu ne’ebe susar atu rekopera no sosiedade lakohi ona simu sira entaun iha limitasaun ba sira nia moris, ne’e impaktu bo’ot ba sira,” dehan Koordenadora Projeitu Organizasaun Ba Futuru, Juliana de Oliveira Marcos, (24/01), iha Comoro, Dili.
Tanba ne’e tuir nia, papel inan aman importante tebes atu proteze oan sira husi hahalok krime tanba involve iha krime ho otas ki’ik sei hamate sira nia future.
Iha parte seluk Vise Ministru Justisa, Ivo Jorge Valente hateten Governu iha ona planu atu estabelese Sentru Detensaun Labarik nune’e bele evita kontaminasaun inklui mos bele muda sira nia mentalidade.
“Sira sei bele muda sira nia hahalok ne’eduni ita fo tratamentu espesial ba sira e hau fiar ho sentru detensaun ne’ebe governu planeia sei halo buat barak positive iha sira nia futuru,” dehan Vise Ministru Justisa ne’e.
Oras ne’e dadaun iha ona labarik menoridade (21 anos mai kraik) kuaze nain 20 mak involve iha krime no sulan hela iha prizaun Becora tanba komete kazu omisidu.
Husi numeru ne’e nain sia status preventive hein prosesu julgamentu no nain lima hetan ona desizaun final ho pena prizaun tinan lima, 10 to’o 15 prizaun.
“Nain ida medida de seguransa, sei iha prizaun laran tanba moras mental,” tenik Vise Ministru Justisa ne’e.
