“Maibe bainhira iha komportamentu diak, entaun ita sei hasai buat ida suspensaun, maibe ami iha konselho ministru sei fo tan suspensaun tinan ida,” dehan Ministru Defeza no Seguransa, Kay Rala Xanana Gusmao, foin lalais, iha Palasiu Prezidente Nicolao Lobato, Dili.
Tuir nia, tinan 2013 ne’e nudar ultimo prova atu Grupu Arte Marsiais sira kuriji an diak liu, hodi hado’ok an husi violensia, hamutuk bele dezenvolve rai ida ne’e.
“Wainhira la kuriji an taka tiha, diskulpa, hau lakohi timor oan ida atu sofre ba ida ne’e,” dehan atual Primeiru Ministru ne’e.
“Buat hotu-hotu diak kuandu ita hadomi malu, respeita malu, rona malu ne’e diak liu,”.
Entretantu Sekretariu Estadu Joventude no Desportu (SEJD), Miguel Manetelo hateten, nia parte sei bolu reprezentante husi grupu Arte Marsiais sira hosi koalia kona ba suspensaun ne’e.
“Rezulusaun ne’e seidauk fo sai iha jornal da republika, kuandu publika ona foin hau bolu sira atu mai koalia ba sira kona ba suspensaun ne’e,” dehan SE Manetelo.
Nia dehan, observasaun no informasaun iha no husi komunidade kona ba attitude grupu arte marsiais sai mos sasukat ida ba suspensaun ne’e.
“informasaun ne’e maka sai sasukat ba konselho ministru atu prolonga tan suspensaun ba tinan ida, alende ne’e mandatu UNMIT nian mos foin remata, ita hakarak pelu menus intermus de estabilidade atu nune’e involvement arte marsiais iha kazu krimi ne’e ita bele redus,” SE Manetelo tenik.
